رسالپور ۔ 15جنوری (اے پی پی) بنجائی وزیر ریلوے شیخ رشید احمد پارینے کہ ایم ایل ون ڈٹ انا پوروی آن ریلوے نا بشخ اٹی مثالی انقلاب اس بریک، مشکل حالیت آتیان پد ہم ریلوے ءِ شونداری نا کنڈا درین، اسہ سال اٹی اسہ کروڑ آن زیات مسافر آتے ٹرین آ اتسا 8 ارب روپئی ودکی کٹیا دوئی کرینن، وزیراعظم ریلوے نا غٹ ملازم آتا بنداوی پے اسکیل آتا اپ گریڈیشن نا منظوری ءِ تسنے، جون 2020آن ریلوے ملازم آتا سکیل آتے ودفنگک، عدالت عالیہ آن حکم امتناہی نا چٹنگ تون غٹ عارضی ملازم آتے آخبتی و سلوک آ بھرتی تا عمل ءِ پورو کننگک، 69 انجن 20 سال آن جوڑجاڑ نا چاری ءُ، اولیکو وار ہندی وڑاٹ ٹرین نا انجن تا جوڑ جاڑ بناکرینے ، بناٹی پاک چین اقتصادی راہداری ڈٹ (سی پیک) بیرہ ریلوے کن ئس ولے داڑان فائدہ ہرفنگ اٹ ریلوے بدبختی اٹ ایلو غٹ بشخ آتیان پدی سلیس ۔ او چار شنبے نادے آ پاکستان لوکوموٹیو فیکٹری رسالپور اٹی 5انجن جوڑ جاڑ آن پد ریلوے نا دوٹی تننگ نا دود آن تران کریکہ ۔ ایم ڈی پاکستان لوکو ٹیو فیکٹری تون اوار پاکستان ریلوے نا ایلو کمامدارآک ہم داوخت آ ساڑی ئسر ۔ دود آن تران کرسا بنجائی وزیر ریلوے شیخ رشید احمد پارے کہ ایم ایل ون نا اولیکو مرحلہ ٹی پشاور آن نوشہرہ اولیتی بنداو تیا 180 کلومیٹر فی گھنٹہ رفتار نا ٹریک تالان کننگک، 180 کوچ جوڑکروئی ءِ، ریلوے دا ملک ءِ مون آ دننگ کیک ۔ اوپارے کہ تدوک آ 70 سال اٹی ہر حکومت سڑک و پول آتا جوڑکننگ آ چکار کرے و ارب آ روپئی نا فنڈ آتے کاریم اٹ ایسور ولے اسہ حکومت اس ہم ریلوے نا شونداری کن ہچ ءُ گام اس ہرفتو ہندا سوب آن اینو ریلوے نا دا حالیت ءِ ۔ اوپارے کہ سی پیک نا بناغا نظر شاغن تو معلوم مریک کہ سی پیک بیرہ ریلوے کن محدود ئس، 14سال مست چین اتون ریلوے نا شونداری کن ایم ایل ون ڈٹ آ دستخط کننگاسس و اینو دا ڈٹ ہموڑے ئس ہراڑے ہلاسرتے ، ولے وزیراعظم عمران خان نا است خواہی آن چین نا کمک اٹ ایم ایل ون ڈٹ ءِ پورو کننگک اودے پشاور آن لاہور و کراچی اسکان نا سفر بھاز کم مریک و اسہ گچین ءُ ٹریک اسے آ ترند گام ٹرین اس چلینگ انگ آن مچ آ ریلوے شونداری نا مزل آتے طے کیک ۔ اوپارے کہ کاریم نیک نیتی اٹ کین تو اللہ تعالیٰ ہم آسانی ودی کیک، پاکستان لوکو موٹوتون اوار پاکستان ریلوے نا غٹ ملازم آک مچ آ ملک اٹی ہردے ئی لکھ آ سفر کروک آ مسافر آتے کن آسانی ودی کیرہ ۔ اوپارے کہ پاکستان ریلوے نا ملازم آتا خواری و لگن اٹ اسہ سال اٹی اسہ کروڑ ودکی مسافر آتے ٹرین آ اتسا 8 ارب روپئی نا ودکی کٹیا دوئی کرینو ۔ بنجائی وزیر شیخ رشید احمد پارے کہ مچ آ دنیا ٹی ریلوے نا بشخ اٹی بیرہ مال گاڈی تیان کٹیا دوئی کننگک ولے پاکستان اسٹ انگا ملک ءِ ہرا مسافر ٹرین تیان کٹیا دوئی کننگ ءِ، تدوک آ سال پاکستان ریلوے مال گاڈی تا بابت ہم تینا ہدف ءِ دوئی کرینے دا سرسہبی تے ٹیم ورک انا وڑاٹ دوئی کرینے ۔ اوپارے کہ وزیراعظم عمران خان نا منت واراُن ہراکنا خواست آ پاکستان ریلوے نا غٹ ملازم آتا اسہ اسکیل اس ودفنگ نا منظوری ءِ تس داڑا عملدرآمد کن کوشست آتے ترند کننگک اینخو سال جون اٹی سکیل آتے ودفنگک ۔ اوپارے کہ بروک آ مسہ تُو اٹی ریلوے ملازم آتا بھلو کچ اس تینا ملازمت نا مد ءِ پورو کننگ آن پد ریٹائرڈ مریرہ داڑتون اوار غٹ خورک مروک آ آسامی تیا مسہ تُو اٹی بھرتی نا عمل ءِ پورو کننگک دا بھرتی ٹی 20 درسد ریلوے ملازم وخت اس کہ شہید، چوری، اقلیت آتون اوار غٹ جتا کروک کوٹہ غاتیا عملدرآمد ءِ ہم پک کننگک ۔ بنجائی وزیر شیخ رشید احمد پارے کہ 14جنوری 2020ء آ ریلوے نا غٹ ٹی ایل اے ملازم آتے آخبتی کننگ خواہسونہ ولے عدالت آن جاری حکم امتناہی نا سوب آن دُن کننگ کتون ہندن کہ عدالت آن حکم امتناہی چٹک غٹ ٹی ایل اے ملازم آتے آخبتی کننگک ۔ اوپارے کہ کبینی، بجلی و گیس انا نہاد آتے ٹی ودکی آن مزور تپہ نا مشکل آتے ٹی ودکی مسنے ہندا دے مون آ تخسا وزیراعظم عمران خان تون ریلوے نا مزور آتا سکیل آتے ودفنگ نا ہیت کریسٹ ۔ اوپارے کہ پاکستان تحریک انصاف وزیراعظم عمران خان نا کماشی ٹی ملک انا اقتدار ءِ سنبھالا تو ملک انا معاشی حالیت، ادارہ غاتا پوزیشن، ڈالر نا نہاد و روپئی نا قدر مچ آ دنیا نا مون آ ئس، 15تُو اٹی دے ونن خواری کننگ آن پد اینو پاکستان معاشی وڑاٹ سوگو و روپئی نا قدر اٹ پدریسہ گچینی مننگ ءِ ۔ اوپارے کہ کنا است خواہی ءِ کہ 200 کوچ آتا تیاری ہم رسالپور فیکٹری ٹی مرے داڑکن فیکٹری ملازم آتا است خواہی و پین خواری درکار ءِ ۔
