اسلام آباد ۔ 15جنوری (اے پی پی) وزیراعظم نا خصوصی کمکار امور نوجوانان عثمان ڈار پارینے کہ ورناتا راجی و معاشی شونداری ساڑی حکومت نا اولیت ءِ، سرسہب ورنا پروگرام نا رداٹ ورناتے واکدار کننگ کن 10 ارب روپئی نا وام تننگ انگ ءِ وخت اس کہ ورناتے کسب کار کننگ کن کسبکار پاکستان پروگرام نا رداٹ درخواست آتا ہلنگ نا عمل برجاءِ، ورناتے کن انٹرن شپ پروگرام، گرین یوتھ موومنٹ و ایلو پروگرام تے بناکننگک ۔ داخیال آتا درشانی ءِ او چارشنبے نادے آ داڑے ‘‘ورناتا توار شونداری نا بنا‘‘ نا سرحال آ دود آن تران کرسا کرے ۔ خصوصی کمکار پارے کہ پاکستان ڈیہہ ٹی ورنا آبادی نا لحاظ اٹ ارٹ میکو ملک ءِ وخت اس کہ پاکستان پنچ می غٹ آن زیات آبادی والا ملک ءِ ۔ اوپارے کہ وزیراعظم عمران خان سرسہب پروگرام نا رداٹ ورناتے کن 100 ارب روپئی جتا کرینے ۔ سرسہب ورناپروگرام نا رداٹ وام تا دوئی کننگ کن 10 لکھ درخواست ملانے ۔ دا اولیکو پروگرام ءِ ہرا ورناتا راجی و معاشی شونداری و راجی رکھ اٹی اہم ءُ کڑد اس ادا کیک ۔ دا پروگرام نا رداٹ سیاسی نیام تمنگ آن پاک میرٹ و شفافیت آ درخواست آتا جانچ پڑتال ءِ کننگ انگ ءِ ۔ اوپارے کہ ورناتے واکدار کننگ کن صوبہ غاتون اواری اٹ کاریم کننگ اُن، ورناتے واکدار کننگ کن مالی و ٹیکنیکل کمک فراوان کننگ آ یو این ڈی پی ، یونیسیف، جاپان و ناروے نا منت وار اُن ۔ یو این ڈی پی خیبر پختونخوا و سندھ اٹی ورناتا شونداری کن گچین کاریم کننگ ءِ ۔ اوپارے کہ چنکا و نیامئی درجہ نا کاروباری ادارہ غاتا کمک اٹ ورناتے کن ملازمت آتا وارخواہی فراوان کننگ آ چکار کرینے ۔ ورناتے کاروبار بناکننگ کن وام تننگ نا مسخت ورناتے اوفتا نت تیا سلفنگ ءِ ۔ سرسہب ورناپروگرام نا رداٹ وام تا دوئی کننگ کن ورناتے تون بایدے بزنس پلاس اس مرے ۔
