اسلام آباد۔ 14جنوری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ وزیراعظم عمران خان نا کماشی ٹی غٹ سیوتی جماعت آک ملکی شونداری و السی شونہالی نا قومی ایجنڈا غا یکجاءُ، سیوت و یکجہتی اتون ہر محاذ آ پاکستان نا فائدہ غاتا رکھ ءِ کینہ، سیوتی تے اوار ہلسا کانہ، قومی شونداری نا عمل ءِ اوفتے پت اٹی ہلسا اوفتا سلابت اٹ مون آ دینہ۔ سے شنبے نادے آ تینا ٹویٹ اٹی ڈاکٹر فردوس عاشق اعوان پارے کہ نقطہ نظر نا اختلاف آ اپوزیشن اٹی خوش مروک آتا اومیت آتے اسہ وار ولدا دیر دننگ والا ءِ، اوفتا است خواہیک اسہ است خواہی اس مرسا رہینگک، اوپارے کہ وزیراعظم عمران خان نا کماشی ٹی ملک و قوم انا شونہالی نا عمل پین واک اٹ مون آ کاہک، ملک انا تہہ ٹی و پیشن حکومتی گام گیج آتا بھرمک چندی سرسہبی تا دروشم اٹ مون آ بننگ ءُ۔ اوپارے کہ وزیراعظم عمران خان نا پارت آتے مون آ تخسا وزیر خارجہ شاہ محمود قریشی نا ایران و سعودی عرب نا دورہ بے کچ مثبت زہم تخک۔ پاکستان چپ سیل کننگ و ہُننگ نا جاگہ غا امت مسلمہ و امن نا فائدہ ٹی بھرمی کڑد ادا کرے۔ اوپارے کہ وزیراعظم عمران خان نا گام آ وزیر خارجہ نا رابطہ و دورہ غاتے مسلم ملک و دنیا قدر انا نظر اٹ ہُننگ ءِ۔ دا ڈیہہ و جہانی کہول آ پاکستان نا ودوک آ کڑد انا نشانی ءِ۔
