اسلام آباد۔ 14جنوری (اے پی پی) پاکستان و چین نا بحری فوج آتا نیام اٹ شش می ہڑتوم آ کنڈآتا مشق سی گارڈینز 2020ایسر مس، مشق انا ایسری دود انا اڈتننگ پاکستان نیوی ڈاکیار ڈ کراچی ٹی مس۔ ترجمان پاک بحریہ نا رداٹ چینی بحریہ نا سویلی تھیٹر کمانڈ نا ڈپٹی کمانڈر وائس ایڈمرل ڈانگ ژن دود انا مہمان خاص ئس۔ کمانڈر پاکستان فلیٹ وائس ایڈمرل آصف خالق ہم داوخت آ ساڑی ئس۔ کمانڈر پاکستان فلیٹ سی گارڈینز 2020ء ٹی بشخ ہلنگ آ چینی بحریہ نا آفیسر و ورناتا منت واری ءِ ہرفے۔ وائس ایڈمرل آصف خالق دا وخت آ پارے کہ مشق سی گارڈینز ہڑتوم آ بحری فوج آتا نیام اٹ سیکورٹی کمکاری و ڈیہہ ٹی بحری چاگڑد نا سوگوی ءِ پین مون آ دیک۔ وائس ایڈمرل ڈانگ ژن پاک بحریہ نا کسبی لائخی و چاہنداری تا ستاءِ کرے۔ مہمان خاص وائس ایڈمرل ڈانگ ژن اوکان پد مشق سی گارڈینز 2020ء نا باقاعدہ ایسری نا پڑو ءِ کرے۔ مشق سی گارڈینز 2020ء ٹی ہڑتوم آ ملک آتا اسپیشل آپریشن فورسز، جنگی جہاز و فضائی میرات آک بشخ ہلکر۔ مشق انا سی فیز اٹی ہڑتوم آ ملک آتا بحری بیڑہ غاک بحرہ عرب اٹی پوسکن آ وڑنا مشق آتا مظاہرہ ءِ کریر۔ \
