اسلام آباد۔ 13جنوری (اے پی پی) وزیراعظم عمران خان پارینے کہ بنجائی حکومت اوار مروک علاقہ غاتے ٹی شونداری ڈٹ آتیا عملدرآمد ءِ ترند کننگ کن فنڈ آتا دمدستی فراوانی کن پرعزم ءِ، اوار مروک علاقہ غاتا جوڑ جاڑ و شونداری و اوفتے ملک انا ایلو بشخ آتا بریبر اتنگ حکومت نا اولیت ءِ، گڑاس پیشن نا زموار دا علاقہ غاتے ٹی بے چیٹی تالان کننگ نا کوشست کننگ ءُ، الس تون اواری اٹ دُن انگا پیشن نا زموار آتا چم آتے بے سہب کروئی ءِ۔ دوشنبے نادے آ وزیراعظم میڈیا آفس آن جاری بیان نا رداٹ داخیال آتا درشانیءِ او صوبہ خیبر پختونخوا ٹی توانائی، ہائر ایجوکیشن، جان جوڑی، شونداری ڈٹ آتا بابت باندات و خاص وڑاٹ اوار مروک علاقہ غاتے ٹی شونداری ڈٹ آتا رفتار نا جاچ ءِ ہلنگ نا دیوان نا کماشی ٹی گپ و تران کرساکرے۔ دیوان اٹی وزیر توانائی عمر ایوب، وزیراعلیٰ خیبر پختونخوا محمود خان، خصوصی کمکار ندیم بابر، صوبائی وزیر خزانہ خیبر پختونخوا تیمور سلیم خان جھگڑا، بنجائی سیکرٹری خزانہ، سیکرٹری ڈٹ بندی، چیف سیکرٹری خیبر پختونخوا، چیئرمین ہائر ایجوکیشن کمیشن طارق بنوری و ایلو سینئر آفیسر آک ساڑی ئسر۔ دیوان اٹی اوار مروک علاقہ غاتے ٹی شونداری ڈٹ آتیا عملدرآمد و داوخت اسکان نا پیش رفت نا جاچ ءِ ہلنگا۔ دیوان اٹی وزیراعظم ءِ پاننگاکہ اوار مروک علاقہ غاتے ٹی شونداری ڈٹ آتا بلاتعطل پیش رفت ءِ پک کننگ کن وزارت خزانہ غان درکار فنڈ آتا فراوانی ءِ پک کننگانے۔ بنجائی حکومت اوار مروک علاقہ غاتے ٹی شونداری ڈٹ آتیا عملدرآمد ءِ پین ترند کننگ کن فنڈ آتا فراوانی کن پرعزم ءِ۔ اوار مروک علاقہ غاتا الس ءِ بجلی نا بلاتعطل فراوانی نا رداٹ کروک آ کوشست آتا بابت وزیراعظم ءِ پاننگانے کہ دا علاقہ غاتے ٹی ٹرانسمیشن نا نزور انفراسٹرکچر ءِ سوگو کننگ نا بابت وزارت توانائی خصوصی چکار کننگ ءِ۔ وزیراعظم دیوان آن تران کرسا پارے کہ اوار مروک علاقہ غاتا الس بے کچ باشعور ءُ۔ اوپارے کہ اوار مروک علاقہ غاتا جوڑ جاڑ و شونداری و اوفتے ملک انا ایلو بشخ آتا بریبر اتنگ حکومت نا اولیت ءِ۔ وزیراعظم پارے کہ حکومت ءِ دا ہیت انا پورو ادراک ءِ کہ گڑاس پیشن نا عنصر دا علاقہ غاتے ٹی بے چیٹی تالان کننگ نا کوشست کننگ ءُ۔ اوپارے کہ ننے الس تون اواری اٹ دُن انگا پیشن نا زموار آتا سازش آتے بے سہب کروئی ءِ۔ داڑکن المی ءِ کہ شونداری ڈٹ و ویل آتا ایسری نا چرجوئی ٹی کروک آ کوشست آتیان اوار مروک علاقہ غاتا الس ءِ پورو وڑاٹ باخبر تخنگے و اوفتے دا مچ آ عمل اٹ ہروڑاٹ شریک کننگے، مالاکنڈ۔ تھری ہائیڈ رو پاور پروجیکٹ و پیہور ہائیڈرو پاور پروجیکٹ نا سلوک آ پیسہ غاتا ادائیگی، مچھائی ہائیڈرو پاور پروجیکٹ نا باندات و پیڈو ڈٹ آتیا انکم ٹیکس انا رعایت تننگ نا باندات آ وزیراعظم وزارت توانائی ءِ پارت کرے کہ صوبائی حکومت تون اواری اٹ دا باندات ءِ ایسر کننگے۔ دیوان اٹی صوبہ خیبر پختونخوا ٹی واقع یونیورسٹی تا مالی گرج آتیا ہم جم حوال۔ چیئرمین ہائر ایجوکیشن کمیشن طارق بنوری یونیورسٹی تا مالی باندات و گرج و دا باندات آتے منظم کننگ نا بابت ہائر ایجوکیشن کمیشن نا کنڈآن جوڑ کروک آ حکمت عملی نا بارواٹی وزیراعظم ءِ جم وڑاٹ معلومدار کرے۔ دیوان اٹی فیصلہ کننگا کہ دا چرجوئی ٹی سرجم دیوان بروک آ منہ دے اٹی اڈتننگک تانکہ ہائر ایجوکیشن کمیشن نا کنڈآن جوڑ کروک حکمت عملی ءِ حتمی دروشم اس تننگ مرے۔ وزیراعظم پارے کہ تعلیم و خاص وڑاٹ ہائر ایجوکیشن اٹی زرکاری حکومت نا اولیت ءِ۔ دا چرجوئی ٹی حکومت ہر وڑنا کوشست کیک کہ تعلیمی ادارہ غاتا روا گرج آتے پورو کننگ مرے۔ صوبہ خیبر پختونخوا ٹی جان جوڑی نا ادارہ غاتا باندات و اوفتا گرج آتیا حوال اٹی وزیراعظم سیکرٹری ڈٹ بندی ءِ پارت کرے کہ صوبہ نا بھلا ہسپتال آتے ٹی جان جوڑی نا آب اٹ آسراتی تا بلاتعطل فراوانی کن پنچ ارب روپئی نا گرج آتے پورو کننگے۔ دیوان اٹی پبلک سیکٹر ڈویلپمنٹ پروگرام نا رداٹ صوبہ خیبر پختونخوا ٹی شونداری ڈٹ آتا جاچ ءِ ہلنگا۔ وزیراعظم صوبائی حکومت نا دا سلاہ غان اتفاق کرے کہ دا ڈٹ آتے ٹی اہم انگا شانزدہ ڈٹ آتے اولیتی بنداو آ پورو کننگ کن بست و بند کننگے۔ وزیراعظم دارداٹ وزارت خزانہ و وزارت ڈٹ بندی ءِ پارت تس۔ وزیراعظم ءِ کرک، ہنگو و کوہاٹ اٹی رائیلٹی نا مد اٹی ملوک آ پیسہ غاتے السی راجی آسراتی کن کاریم اٹ اتنگ نا بابت ہم سلاہ پیش کننگا۔ دیوان اٹی صوبہ خیبر پختونخواہ ٹی چندی بشخ آتابابت شونداری ڈٹ آتیا گپ و تران اٹی وزیراعظم دا ہیت آ زور شاغا کہ چندی علاقہ غاتے ٹی کنوئی آ ساف دیر انا فراوانی نا ڈٹ آتے اولیتی بنداو تیا پورو کننگے۔ صوبہ خیبر پختونخوا نا شار تیٹی سالڈ ویسٹ مینجمنٹ نا بابت ہیت کرسا وزیراعظم پارے کہ مچ آ ملک اٹی سالڈ ویسٹ مینجمنٹ نا بابت قومی پالیسی ٹہیفنگ نا گرج ءِ۔ اوپارے کہ دا چرجوئی ٹی غٹ صوبائی حکومت آتون اواری اٹ قومی کہول آ سالڈ ویسٹ مینجمنٹ پالیسی اس ٹہیفنگ نا عمل نا بناءِ کننگے تانکہ ہراڑے شارتا سفائی ءِ پک کننگے ہموڑے سالڈ ویسٹ مینجمنٹ نا بابت منظم نظام اس ٹہیفنگے و سالڈ ویسٹ ءِ توانائی کن کاریم اٹ اتنگ مرے۔
