اسلام آباد۔ 13جنوری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ سعید غنی صاحب نا لاعلمی آ افسوز ءِ، قوم انا مال ءِ پُلنگ و دروغ انا حساب وکتاب آ زرگزران ءِ چلیفوک آتے دا ہم سما اف کہ وزیراعظم عمران خان نا کماشی ٹی خراج ہلنگ اٹی ودکی مسنے، اینخو نا مالی سال انا ششماہی ٹی دوئی کروک خراج آک 2085ارب ءُ ہرا تدوک آ سال انا مقابلہ ٹی 16.4درسد زیات ءُ۔ دوشنبے نادے آ ڈاکٹر فردوس عاشق اعوان تینا ٹویٹ اٹی پارے کہ تدوک آ سال انا مقابلہ ٹی درآمد آتا کچ 21 درسد کم مس وخت اس کہ داخلی خراج یعنی انکم ٹیکس، سیلز ٹیکس و ایکسائز ڈیوٹی ٹی بالترتیب 21.2درسد، 34 درسد و 25.6 درسد ودکی مس۔ اوپارے کہ سمارٹ فون تا کمک اٹ سالانہ گوشوار جمع کرفنگ کن خراج آسان ایپ اس درستی راستی کرفنگا، عمران خان ہمو اولیکو وزیراعظم ءِ ہرا ملک اٹی خراج ہلنگ ءِ اسہ تحریک اسے نا دروشم تس و خراج نظام اٹی اصلاحات آ کاریم نابناءِ کرے۔ ڈاکٹر فردوس عاشق اعوان پارے کہ ایف بی آر نا پورٹل آ خلقت نا سفر، ڈغار نا لین دین، ودہولڈنگ و گاڈی تا بابت سرجم آک دوئی ءُ، داسال 105 ارب نا ری فنڈ جاری مس وخت اس کہ تدوک آ سال 36 ارب نا ری فنڈ جاری مسوسس۔
