اسلام آباد۔ 13جنوری (اے پی پی) وزیر خارجہ مخدوم شاہ محمود قریشی پارینے کہ پاکستان بے چیٹی ٹی کمتی نا ایرانی اولیت نا ستا ءِ کیک، اومیت ءِ ایران مون تروک حالیت آتیان تینا روایتی پامداری اتون مون ایتک، پین ملک اسے نا برخلاف تینا گل زمین ءِ کاریم اٹ اتنگ موکل ایتنہ نئے ڈیہہ ٹی جھیڑہ سے نا بشخ مرینہ۔ اوداہیت آتے وزیراعظم عمران خان نا پارت آتے مون آ تخسا ڈیہہ نا ملک آتا دورہ نا اولیکو مرحلہ ٹی ایران نا اِرادے ئی سرکاری دورہ ٹی ایرانی سرکڑدہ غاتون اوڑدہی تیٹی کرے۔ وزیر خارجہ نا دورہ نا مسخت دے ٹکی نیامی ٹی ساڑی آ بے چیٹی تیٹی کمتی اتنگ و سفارتی ذریعہ اٹ مون آہِننگ نا کسر ءِ آوار کننگ اٹ کمک فراوان کننگ ئس۔ وزیر خارجہ ایران صدر نا صدر ڈاکٹر حسن روحانی تون اوڑدہی کرے وخت اس کہ ایرانی وزیر خارجہ ڈاکٹر جواد ظریف تون ہم جتا اوڑدہی کرے۔ دااوڑدہی تیٹی دے ٹکی نیامی، خلیجی ڈیہہ نا حالیت و پیش بروک آ ساڑی آ واقعہ غاتیا گپ و تران مس۔ پاکستان و ایران نا تعلقداری تیا ہم گپ و تران مس۔ وزیر خارجہ ایران تون پاکستان نا خوشگوار برادرانہ تعلقداری تا اہمیت نا درشانی ءِ کرے و ہڑتوم آ ملک آتا نیام اٹ جوڑ تاریخی کثیر الجہتی تعلقداری تے پین سوگوی نا عزم انا درشانی ءِ کرے۔ ساڑی واقعہ غاتیا پاکستان نا نکتہ نظر ءِ بیان کرسا وزیر خارجہ بے کچ ضبط و تحمل کننگ و غٹ کنڈآتیان بے چیٹی تیٹی کمتی کن دمدستی گام گیج آتا اہمیت ءِ تالان کرے۔ اوپارے کہ جنگ ہچ کس نا فائدہ ٹی اف، ہیت وگپ و سفارتکاری نا کمک اٹ ویل بایدے ایسر مرے۔ وزیر خارجہ ڈیہہ ٹی تینا ہم منصب آتون ٹیل فون آ مروک آ گپ و تران آن ایرانی سرکڑدہ غاتے معلومدار کرسا پارے کہ بے چیٹی ٹی کمتی و جنگ آن بچنگ نا حق اٹی اسہ عمومی اتفاق رائے اس خننگک۔ وزیر خارجہ زور شاغسا پارے کہ پاکستا ن پین ملک اسے نا برخلاف تینا گل زمین ءِ کاریم اٹ اتنگ نا موکل تفک و نئے پاکستان ڈیہہ ٹی جنگ یا جھیڑہ نا بشخ مریک۔ اودرشانی ءِ کرے کہ پاکستان بیرہ امن اٹی بشخدار مننگ کیک۔ وزیر خارجہ پارے کہ پاکستان چک و تاڑ و بے چیٹی ٹی کمتی نا ایرانی اولیت نا ستاءِ کیک و اومیت کیک کہ ایران مون تروک حالیت آتون تینا روایتی پامداری اتون مون ایتک۔ وزیر خارجہ زور شاغا کہ حالیت آتا پیچیدگی آن پد ہم پاکستان امن کن کاریم ءِ برجاتخک انتئے کہ دا ڈیہہ و دنیا نا اجتماعی فائدہ ٹی ءِ۔ دارداٹ پاکستان غٹ کڑدہ غاتیا زور شاغک کہ باندات اٹی تعمیراتی وڑءِ تینا کیر تانکہ امن برقرار سلے وخت اس کہ جھیڑہ غاتا سفارتی ذریعہ اٹ ایسری اس پٹنگے۔ وزیر خارجہ کشمیری تا حق خودارادیت و دا جھیڑہ نا اقوام متحدہ نا سلامتی کونسل نا قرارداد آتا رداٹ زوت ایسری کن ایران نا پبی و پدریسہ مخ تفی نا منت واریءِ ہرفے۔ صدر حسن روحانی و وزیر خارجہ جواد ظریف وزیر خارجہ مخدوم شاہ محمو د قریشی نا دورہ نا ستاءِ کرے و دا اہمیت ءِ تالان کرے ہرا ایران برادر ملک پاکستان تون تینا تعلقداری تے ایتک۔ اوپارے کہ الس نانیام اٹ جوڑ دا تعلق نا کلیدی پہلو دادے کہ ہڑتوم آ ملک آک آزمائش نا ہر ساہت اٹی اسہ ایلوتون سلوک مسنو۔ ساڑی حالیت آتا رداٹ اوزور شاغا کہ ایران بے چیٹی و چک و تاڑ اٹی کمتی اتنگ و ڈیہہ ٹی امن و سلامتی ءِ برقرار تخنگ ءِ اولیت ایتک۔ دارداٹ زمواری غٹ کنڈآتیاٹی ءِ۔ ایرانی سرکڑدہ غاک سفارتی و سیاسی ذریعہ اٹ امن ءِ مون آ دننگ و بے چیٹی ٹی کمتی اتنگ کن کمکاری نا بابت وزیراعظم عمران خان نا کوشست آتا ستاءِ کریر۔ اوپارے کہ ایران مستین اٹی وزیراعظم نا گام انا مخ تفی ءِ کریسس و نن اونا ساڑی کوشست آتا ستاءِ کینہ۔ داکان مست وزیر خارجہ مخدوم شاہ محمود قریشی مشہد شار آ ہنا ہراڑے او حضرت امام رضا نا روضہ اقدس آ حاضری تس و دعا پاتیا کرے۔ وزیر خارجہ نا دورہ نا بروک آ مرحلہ سعودی عرب ءِ۔
