اٹاوا۔ 13جنوری (اے پی پی) ڈپٹی اسپیکر قومی اسمبلی قاسم خان سوری پارینے کہ نئے بیرہ وزیراعظم عمران خان نا کماشی ٹی ساڑی حکومت تینا مد ءِ پورو کیک بلکن بروک آ حکومت ہم تحریک انصاف نا مریک۔ داخیال آتا درشانی ءِ او کینیڈا نا اسہ نجی ٹی وی چینل اسے نا پروگرام اٹی میزبان نا سوج آتا ورندی ءِ ترسا کرے۔ ڈپٹی اسپیکر قاسم خان سوری دورہ کینیڈا ٹی اٹاوا ٹی کامن ویلتھ ملک آتا اسمبلی تا اسپیکرز نا کانفرنس اٹی بشخ ہلک و اسہ سیشن اسے نا کماشی ءِ کننگ نا شرف ءِ ہم دوئی کرے۔ ڈپٹی اسپیکر قاسم خان سوری کینیڈین نجی ٹی وی چینل پروگرام اٹی گپ و تران کرسا پارے وپارے کہ ننے کرپشن زدہ حالیت آک ملار ہرادے نن سہی کننگ نا کوشست کننگ اُن۔ ہرراج اٹی ویل آک مریرہ و پاکستان اٹی ہراوڑ تدوک آ ہفتاد سال اٹی ادارہ غاک کرپشن زدہ مسر دا سوب آن خلقت ءِ بنداوی آسراتی دو بننگ کتو۔ الس کنوئی آ دیر انا عدم دستیابی، جان جوڑی نا آسراتی تا کمتی، تعلیم، بے روزگاری و داڑتون اوار اوار قوم دہشت گردی نا ہم مقابلہ ءِ ہم کرسا کرے۔ ڈپٹی اسپیکر قومی اسمبلی پارے کہ پاکستان تحریک انصاف ءِ داحالیت آتے ٹی 2018ء ٹی حکومت ملا، و خلقت نا پاننگ ئس کہ داسہ ملک ءِ ہندن ءُ حکمران اس ملانے ہرا کرپشن آن پاک ءِ ہرانا شاہدی ءِ مچ آ دنیا ایتک کہ وزیراعظم عمران خان اسہ ایماندار ءُ بندغ اسے۔ اوپارے کہ احتساب نا عمل اٹی مشکلات ارے ولے عمران خان نا ایماندار کماشی ٹی پاکستانی راج ءِ کرپشن آن پاک کننگک۔ پاکستان تحریک انصاف حکومت نا سرسہبی تا بابت چست کروک آ اسہ سوج اسے نا ورندی ٹی ڈپٹی اسپیکر قومی اسمبلی قاسم خان سوری نا پاننگ ئس کہ پاکستان تحریک انصاف نا حکومت الس کن ہمو گام گیج آتے کرے کہ ہرا اینو اسکان اسہ حکومت اس ہم کتنے۔ اوپارے کہ پاکستان تحریک انصاف نا تاریخی سرسہبی تیٹی خارجہ پالیسی ٹی گچینی، کشمیر نا ویل ءِ مچ آ دنیا ٹی تالان کننگ، فاٹا ءِ ضم کننگ، ویزا دوئی کننگ اٹ آسانی، سادگی و کفایت شعاری مہم نا کمک اٹ مروک آ بچت، کرپشن آ کریک ڈاؤن، جان جوڑی کارڈ، نیزگاری نا چٹفنگ نا پروگرام، پناہ گا تا جوڑ کننگ، سرسہب ورناپروگرام، چاگڑدی بدلی نا بابت شجر کاری مہم، مدرسہ اصلاحات، کرتارپور راہداری، سیل و سوات ءِ مون آ دننگ، مواصلات نا نظام اٹی گچینی و کیہی ایلو السی ڈٹ آک اوار ءُ۔ قومی اسمبلی ٹی کانود جوڑ کننگ نا بابت سوج آ ڈپٹی اسپیکر قومی اسمبلی پارے کہ پاکستان تحریک انصاف حکومت داوخت اسکان نا تینا گونڈ انگا دور حکومت اٹی”زینب الرٹ‘‘رسپانس اینڈ ریکوری‘ بل 2019ء نا امنائی وڑاٹ منظوری ءِ تس۔ گچین کاری تا غاو و پٹیشن آتے ترندی اٹ ایسر کننگ کن بینچ آتے ٹی ودکی، ہیوی انڈسٹریز ٹیکسلا نا بورڈ انا واکداری تیٹی ودکی، اسلام آباد ہائی کورٹ نا جج آتا کچ اٹی ودکی، اسلام آباد و سیمینار گھر تیٹی تمباکو نوشی نا بابت بل منظور کرفے۔ قاسم خان سوری پارے کہ ای آرمی ایکٹ نا منظوری کن بلاول بھٹو تون اوار اپوزیشن راہشون آتون اوڑدہی کریٹ و اپوزیشن راہشون آتون ایہن ہم ملسا کیوہ۔
