لاہور۔ 13جنوری (اے پی پی) چیف جسٹس لاہور ہائی کورٹ مسٹر جسٹس مامون رشید شیخ پارینے کہ ننا کاریم سوالی تا دڑد و خواہنداری تا ایسری ءِ، ہیلکاری کورس آتا بنداوی مسخت لس سوالی تے گچین انصاف نا فراوانی ءِ، جج آک گچین ءُ فیصلہ کیر، وسیلہ غاتا کمتی نا سوب پوسکن آ جوڈیشل کمپلیکس، کورٹس و ایلو آسراتی تیکن مناسب فنڈ اف ولے ننا پورو کوشست ءِ کہ ججز، وکلاء و سوالی تے ہر وڑاٹ آسراتی فراوان کننگے۔ او دوشنبے نادے آ پنجاب جوڈیشل اکیڈمی ٹی جنرل ٹریننگ پروگرام نا رداٹ دہ می ہیلکاری کورس انا بنائی سیشن آن تران کریکہ۔ داوخت آ رجسٹرار عبدالستار، ڈی جی ڈسٹرکٹ جیوڈیشری اشتر عباس، ڈی جی پنجاب جوڈیشل اکیڈمی حبیب اللہ عامر و سیشن جج ہیومن ریسورس ساجد علی اعوان تون اوار اکیڈمی نا انسٹرکٹرز و آفیسر آک ہم ساڑی ئسر۔ شش دے ئی ہیلکاری کورس اٹی ایڈیشنل سیشن ججز و سول جج آک بشخ ہلنگ ءُ۔ مامون رشید شیخ پارے کہ ننا جج آک کچ اٹنگا وسیلہ غاتے ٹی گچین کاریم کننگ ءُ۔ نن پنجاب جوڈیشل اکیڈمی نا ہم منت وار اُن ہرا ننا جج آتے ساڑی آ دور اتون ہم گرنچ تربیت فراوان کننگ ءِ۔ فاضل چیف جسٹس نا پاننگ ئس کہ جج آک گچین فیصلہ کیر، کانود و میرٹ نا رداٹ انصاف نا فراوانی ءِ پک کیر، داڑکن پورو دیانتداری، خواری و لگن اٹ تینا کاریم ءِ برجاتخر۔ ننے اومیت ءِ کہ جج آتے اکیڈمی ٹی ہیل کننگ نا گچین وارخواہی دوبریک، ہراڑان جوڈیشل آفیسر آتا کاریم نا کچ اٹی ودکی و لائخی تیٹی نکھار بریک۔
