اسلام آباد۔ 13جنوری (اے پی پی) چیئرمین جوائنٹ چیفس آف اسٹاف کمیٹی جنرل ندیم رضا نیول ہیڈکوارٹرز نا دورہءِ کرے۔ امیر البحر ایڈمرل ظفر محمود تون اوڑدہی کرے ہراٹی کسبی باندات و ڈیہہ نا جم سیکورٹی حالیت آتیا گپ و تران کننگا۔ ترجمان پاک بحریہ نا رداٹ نیول ہیڈ کوارٹرز آ بننگ آ پاک بحریہ نا سروک ایڈمرل ظفر محمود عباسی شرفدار آ مہمان ءِ بخیر کرے۔ پاک بحریہ نا چاق و چوبند دستہ چیئرمین جوائنٹ چیفس آف اسٹاف کمیٹی ءِ گارڈ آف آنر پیش کرے۔ شرفمند آ مہمان نا پرنسپل اسٹاف آفیسر آتون درستی راستی ءِ کرفنگا۔ اوکان پد چیئرمین جوائنٹ چیفس آف اسٹاف کمیٹی پاک بحریہ نا سروکت تون اوڑدہی کرے۔ نیول چیف جنرل ندیم رضاءِ زمواری تے سنبھالنگ آ مبارکبادی تس۔ امیر البحر دا عزم انا درشانی ءِ کرے کہ پاک بحریہ سلہہ بند فوج انا اسیجا بشخ آتے ٹی کمکاری و ہم گرنچی کن تینا کڑد ءِ ادا کرسا کیک۔ چیئرمین جوائنٹ چیفس آف اسٹاف کمیٹی ءِ نیول ہیڈکوارٹر اٹی چندی آپریشنل باندات آتیا حوال ہم تننگا۔ چیئرمین جوائنٹ چیفس آف اسٹاف کمیٹی ڈیہہ ٹی سمندری رکھ اکن پاک بحریہ نا کسبی لائخی و کارکڑد انا ستاءِ کرے۔
