کوءٹہ ۔ 10 جنوری (اے پی پی) باسک صوبائی اسمبلی میر یونس عزیز زہری پارینے کہ الس نا خذمت مشن ءِ و ہرا فنڈ و وسیلہ ننے بجٹ اٹی تینا حلقہ کن دوبریک اوفتے امانت سرپند کرسا الس آ خڑچ کننگ ءِ تینا فرض سرپند کینہ ۔ اولیکو وار خضدار سٹی آن ہلیس کودہ کوڑاسک اسکان فنڈ آتے ساف وڑاٹ بشخانن ، کنوئی آ ساف دیر، بجلی، تعلیم ، جان جوڑی ، سڑک آتا جوڑ کننگ تون اوار ایلو ڈٹ آتیا 32کروڑ آن زیات روپئی خڑچ کننگ اُن ۔ خضدار نا الس نا ویل آتا ایسری کن ننا جہد برجاسلک ہراکہ کہ اومیت اس مریک ہموڑے الس نا خاطر سرمرینہ تانکہ الس نا ویل آک ایسر مریر الس نا خاطر انت کہ کروئی مرے اوفتے کینہ گدرینگنہ ۔ داخیال آتا درشانی ءِ او خضدار اٹی جمعیت علمائے اسلام تحصیل نا مجلس عمومی دیوان آن تران کرسا و جے یو آئی یونٹس نمائندہ غاتا چست کروک آ سوج آتا ورندی ءِ ترسا کرے ۔ باسک بلوچستان اسمبلی میر یونس عزیز زہری نا پاننگ ئس کہ دا وار بجٹ اٹی بھلو کچ اسے ٹی واٹر سپلائی اسکیم سولر سسٹم تون اوار جتا کریسن، خضدار فیروز آباد نال کودہ کوڑاسک اٹی واٹر سپلائی ڈٹ اس جوڑ کرینن ، وسیلہ غاک کچ اٹ و ویل آک زیات ءُ ولے اوکان پد ہم مچ آ حلقہ نا احاطہ ءِ کننگ نا کوشست کرینن ۔ داسہ کوشست ءِ کہ سٹی ٹی دونیم سد بجلی نا کھمبہ و 70 ٹاسفارم خلنگے، ننا اولیکو سال ئس ہراٹی کنوئی آ ساف دیر انافراوانی ءِ زیات اہمیت تننگا ، سڑک آتا جوڑ کننگ تون اوار ایلو ڈٹ آتے کن زر جتا کرین، بروک آ مرحلہ ٹی بجلی نا ڈٹ آتے خاص اہمیت تننگک ۔ دا بابت الس نا سلابت ءِ فوقیت ترسا اجتماعی ڈٹ آتے خاص اہمیت تننگک ۔ یقینا ننا صوبہ و ننا ضلع غاک نیزگاری و پسماندہ ءُ ، خلقت نا ویل آک زیات ءُ ، انفرادی کاریم تا جاگہ غا اجتماعی کاریم تے زیات اہمیت تننگ انگ ءِ ۔ کنا کوشست مریک کہ اسہ درگہ سے ہم الیپر ہراکان الس نا ویل آتا ایسری ٹی اومیت اس پین مرے ۔ الس کنے آ ہرا پت انا درشانی ءِ کرینے او پت آ پورو سلنگ کن ہر آخیری حد اسکان ہِننگ کن تیار اُٹ ۔
