اسلام آباد ۔ 10جنوری (اے پی پی) قومی اسمبلی 18سال آن کم وئی نا چناتا برمتہ، نرفنگ، خون یا ٹھپی کننگ یا اوڑان زنا بالجبر نفسانی است خواہی تے پورو کننگ نا زموار ءِ سزائے موت یا عمر قید و اسہ کروڑ روپئی آن اِرا کروڑ روپئی اسکان جرمانہ نا سزا نا حامل زینب الرٹ بل ءِ امنائی وڑاٹ منظور کرے ۔ جمعہ نادے آ بنجائی وزیر انسانی حق ڈاکٹر شیریں مزاری تحریک پیش کرے کہ زینب الرٹ ورندی ردعمل و بازیابی بل 2019ء آ سجفنگے ۔ ایوان آن تحریک نا منظوری آن پد اسپیکر بل انا غٹ شق آتا ایوان آن منظوری دوئی کرے ۔ بنجائی وزیر ڈاکٹر شیریں مزاری تحریک پیش کرے کہ بے گواہ و برمتہ مروک آ چناتے کن الرٹ ءِ ودفنگ، ورندی ردعمل و بازیابی کن پرمان وضع کننگ نا بل ’زینب الرٹ‘ ورندی ردعمل و بازیابی بل 2019ء ءِ منظور کننگے ۔ قومی اسمبلی بل انا امنائی اٹ منظوری ءِ تس ۔ ڈاکٹر شیریں مزاری بنجائی وزیر اسد عمر و پیپلزپارٹی نا باسک ڈاکٹر مہرین رزاق بھٹو نا دا بل انا بابت کڑد ادا کننگ آ منت واری ءِ ہرفے ۔ بنجائی وزیر اسد عمر پارے کہ زینب تون پیش بروک آ واقعہ غان پد ای بل ءِ ایوان اٹ پیش کریسٹ ۔ کمیٹی ہفت تُو انا وخت خڑچ کرے ۔ ننا اولی زمواری ءِ کہ چناتا رکھ اکن کانود جوڑ کین ۔ پاکستان نا چناک ہرطاقت ور عہدہ غان زیات اہم ءُ ۔ سینیٹ ہم دا بل ءِ زوت آن زوت منظور کے ۔ ڈاکٹر مہرین رزاق بھٹو بل انا منظوری آ مچ آ ایوان ءِ مبارکباد پیش کرے ۔ اوپارے کہ دا بل داسہ بھاز جوان ءُ دروشم اسے ٹی بسنے ۔ زینب نا ارٹ میکوکزیہ دے انا وخت آ دا بل منظور مسنے ۔ ہر صوبہ دا بل انا تقلید اٹی بایدے کانود اس جوڑ کے ۔ دا بل انا رداٹ ون ونڈو آپریشن نا رداٹ ریسکیو و ریکوری مریک ۔ اِرا گھنٹہ ٹی ایف آئی آر درج مریک و مسہ تُو انا تہہ ٹی دا وڑنا واقعہ غاتے چٹفنگ نا حدءِ مقرر کننگانے ۔ زینب الرٹ بل انا رداٹ 18 سال آن کم وئی نا چناتا برمتہ، اوفتے نرفنگ ، اونا خون یا ٹھپی کننگ یا اوڑتون زنا بالجبر نفسانی است خواہی پورو کننگ نا زموار ءِ سزائے موت یا عمر قید و اسہ کروڑ روپئی آن اِراکروڑ روپئی اسکان جرمانہ نا سزا تننگک وخت اس کہ ہژدہ سال آن کم وئی چناتے ذاتی، غیر منقولہ جائیداد آ بدنیتی اٹ کوعزہ کننگ نا ارادہ اٹ برمتہ کننگ آ ہم عمر قید نا سزا و 10 لکھ روپئی اسکان جرمانہ کننگک ۔ پنچ شنبے نادے آ قومی اسمبلی ٹی قائمہ کمیٹی نا کنڈآن پیش کروک بل اٹی پاننگانے کہ دا کانود نا رداٹ زینب الرٹ ورندی ردعمل و بازیابی ایجنسی بے گواہ و برمتہ مروک اطفال (زارا) ایجنسی جوڑ کننگک ہرانا سروک ڈائریکٹر جنرل مریک ۔ دا بل دمدستی وڑاٹ نافذ العمل مریک ۔ اونا دنگ بنجائی دارالحکومت مریک ۔ دا بل انا رداٹ پولیس سٹیشن ہراڑے چنانا بے گواہ یا برمتہ نا حوال ءِ تننگک او دمدستی غاو انا نوشتہ کننگ نا اِرا گھنٹہ نا تہہ ٹی زارا ءِ بے گواہ چنانا واقعہ نا حوال ایتک ۔ ہژدہ سال آن کم وئی نا چناتا برمتہ یا اوفتے نرفنگ، اونا خون، اودے بھاز ٹھپی کننگ، غلام جوڑ کننگ، زنا بالجبر یا بندغ اسے نا نفسانی خواہش کن بہا کیک تو اودے سزائے موت تننگک یا عمر قید یا ہنداخہ مد اکن قید سخت انا سزا تننگک ہراکہ 14سال مننگ کیک و ہفت سال آن کم مفک ۔ اودے اسہ کروڑ آن اِرا کروڑ اسکان جرمانہ ہم کننگک ۔ داکانود نا رداٹ دُن انگا مقدمہ غاتا سماعت مسہ تُو انا تہہ ٹی پورو کننگک ۔ دا ایکٹ نا رداٹ اسہ پولیس آفیسر اس ہم ہرا بے گواہ یا برمتہ مروک چنانا حالیت اٹ جم کانود نا دفعہ 154نا پرمان تا تعمیل کپک یا سرکاری آفیسر اس دانستہ ہرے کیک یا دا ایکٹ نا رداٹ جوڑ کروک قاعد ہ نا رداٹ معلومداری نا فراوانی یا کارروائی ٹی اڑاند شاغک تو اودے اسہ سال اسکان قید و جرمانہ نا سزا تننگ مریک ۔
