اسلام آباد ۔ 10 جنوری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان پارینے کہ ورناک ننا ملک انا نہادی میرات ءُ ، پاکستان تحریک انصاف نا سرسہبی ٹی ورناتا کلیدی ءُ کڑد اسے، عمران خان تینا ویژن، ثابت گامی و نظریہ غان ورناتے زہمی کرے، ورناک پاکستان اٹی وڈی خوری و میراتی خاہوتی سیاست آن بیزار ئسر ۔ جمعہ نادے آ تینا ٹویٹ اٹی ڈاکٹر فردوس عاشق اعوان پارے کہ عمران خان ورناتا اومیت ءِ ، اوفتے کسب کار کننگ وزیراعظم نا مشن ءِ ، 30 ارب روپئی نا کسب کار پاکستان پروگرام ورناتا شونداری و اوفتے لاءخ جوڑ کننگ اٹ مزل نا نشان مریک، دا پروگرام ورناتے تعلیم و تربیت و ٹیکنالوجی نا مہارت آن لیس کرسا ساڑی خواست آتا ہم پلہ کیک ۔ اوپارے کہ ملکی تاریخ اٹی اولیکو وار 70 مدرسہ غاتے ٹی کسب کار جوڑ کننگ و فنی تعلیم نا بست و بند کننگانے، اولیکو حکومت ءِ ہرا مدرسہ غاتا چناتے کن مذہبی تعلیم تون اوار اوار اوفتے تکنیکی و فنی مہارت آن ہم شپ کیک ۔ ڈاکٹر فردوس عاشق اعوان پارے کہ ہنداوڑ دا ورناتے روزگار نا اسہ وڑ وارخواہی فراوان مریک ۔ نیشنل ایکریڈیشن کونسل نا اڈتننگ ملک اٹی کسبی تربیت نا آب اٹی اہم ثابت مریک، کسبی تعلیم اسکان رسینگ ءِ پک کننگ کن 75 سمارٹ کلاس رومز و دوست ملک آتا کمک اٹ 5سینٹرز آف ایکسیلینس جوڑ کننگک ۔
