اسلام آباد ۔ 10 جنوری (اے پی پی) وزیر خارجہ شاہ محمود قریشی پارینے کہ پاکستان و ایران نا نیام اٹ سوگو تاریخی، مذہبی و کثیر الجہتی برادرانہ تعلقداری ءِ، پاکستان، ڈیہہ ٹی بے چیٹی تے کم کرفنگ کن تینا مثبت کڑد ءِ ادا کننگ کن پرعزم ءِ ۔ ترجمان دفتر خارجہ نا رداٹ داہیتءِ او پاکستان اٹی تعینات پوسکن آ ایرانی سفیر سید محمد علی حسینی تون گپ و تران کرسا پارے ہراجمعہ نادے آ اوڑتون اوڑدہی کرے ۔ دا اوڑدہی وزیر خارجہ نا چیمبر پارلیمنٹ ہاءوس اٹی مس ۔ اوڑدہی ٹی ایران، امریکہ بے چیٹی و ڈیہہ ٹی امن و ایمنی نا حالیت آتیا گپ و تران کننگا ۔ وزیر خارجہ مخدوم شاہ محمودقریشی بطور سفیر پاکستان تعیناتی آ سید محمد علی حسینی ءِ مبارکبادی تس و بخیر اٹ پارے ۔ وزیر خارجہ پارے کہ پاکستان و ایران نا نیام اٹ سوگو تاریخی، مذہبی و کثیر الجہتی برادرانہ تعلقداری ءِ ۔ کنے اومیت ءِ کہ نے کون آ جوان انگا سفارتکار نا تعیناتی آن پاک ایران ہڑتوم آ کنڈآتا تعلقداری پین سوگو مریک ۔ شاہ محمود قریشی پارے کہ ڈیہہ ٹی ودوک آ بے چیٹی ہچ کس نا فائدہ ٹی اف ۔ پاکستان، ڈیہہ ٹی بے چیٹی تے کم کرفنگ کن تینا مثبت کڑد ءِ ادا کننگ کن پرعزم ءِ ۔ ڈیہہ نا چندی وزیر خارجہ غاتون رابطہ ٹی اُٹ ۔ وزیراعظم عمران خان نا خصوصی پارت آ زوت ایران تون اوار اہم بیرونی دورہ غاتیا روانہ مننگ اُٹ ۔ ایرانی سفیر محمد علی حسینی وزیر خارجہ مخدوم شاہ محمود قریشی نا منت واری ءِ ہرفسا ، پاک ایران ہڑتوم آ کنڈآتا تعلقداری تے پین ودفنگ کن تینا پبی کوشست آتے کاریم اٹ اتنگ نا باوری کرفے ۔
