اسلام آباد۔ 17 فروری (اے پی پی) وزیراعظم نا سلاہکار قومی تاریخ و ادبی میرات عرفان صدیقی پارینے کہ علامہ اقبال نا افکار نا ترویج اقبال نا اکادمی نا بایدے اولین اولیت مرے انتئے کہ علامہ اقبال نا فکر بیرہ ننا مسکوہی تون ہی آخا بلکن ساڑی و آخبت تون ہم بھلو تعلق اس تخک۔ او2017 ءآ علامہ اقبال نا 140می یوم ولادت نا مناسبت آن خصوصی دود آتا اڈتننگ نا سال گوندا۔ داہیت ئِ او اقبال اکادمی پاکستان نا گورننگ باڈی نا دیوان نا کماشی ئِ کرسا پارے۔ قومی تاریخ و ادبی میرات ڈویژن اٹی جمعہ آ اڈہلوک آ دیوان اٹی اقبال اکادمی نا مجلس منتظمہ نا سروک منیب اقبا ل نا سروکی ٹی اسہ خصوصی کمیٹی اس اڈتننگ نا فیصلہ مس ہرا نومبر 2017 ءٹی علامہ اقبال بین الاقوامی کانفرنس آن بیدس ایلو دود و ڈٹ آتا بارواٹی سفارش آتے پیش کیک ۔ دیوان اٹی سیکرٹری قومی تاریخ و ادبی میرات عامر حسن، جوائنٹ سیکرٹری سید جنید اخلاق آن بیدس گورننگ باڈی نا باسک ڈاکٹر عبدالغفار سومرو، میاں محمد افضل حیات، ڈاکٹر پیر زادہ، سید قاسم رضا صدیقی، ڈاکٹر ضیاءالحق ، ڈاکٹر رفیع الدین ہاشمی ، ڈائریکٹر اقبال اکادمی سہیل مفتی و اکادمی نا خزانچی سرشاراحمد خان ئسک ساڑی ئسر۔
