اسلام آباد ۔ 09 جنوری (اے پی پی) قومی اسمبلی ءِ پاننگانے کہ تحریک انصاف نا حکومت نا دوراٹی اتوک آ ایمنسٹی اسکیم آن 1لکھ 24ہزار آن زیات بندغ فائدہ ہرفیر وخت اس کہ داڑان 62ارب روپئی نا ریکوری مس، مسلم لیگ (ن) نا دور اٹی بروک آ ایمنسٹی اسکیم آن 76 ہزار آن زیات بندغ فائدہ ہرفیر وخت اس کہ 123 ارب روپئی ریکوری مس ۔ پنچ شنبے نادے آ قومی اسمبلی ٹی وقفہ سوج آتے ٹی طاہرہ اورنگزیب نا سوج انا ورندی ٹی وزیر مملکت پارلیمانی امور علی محمد خان پارے کہ اسہ لکھ 24ہزار 587 خلقت ایمنسٹی اسکیم آن فائدہ ہرفیر وخت اس کہ مسلم لیگ (ن) نا دور اٹی 78958 بندغ فائدہ ہرفیر ۔ ہراخلقت دا اسکیم آن فائدہ ہرفتنو اوفتا برخلاف کارروائی کننگ ایف بی آر نا کاریم ءِ ۔ نفیسہ شاہ نا سوج انا ورندی ٹی اوپارے کہ 2018ء نا اسکیم اٹی 76 ہزار بندغ آن 123 ارب روپئی ریکور مس وخت اس کہ پی ٹی آئی نا دور اٹی اسہ لکھ 24ہزار بندغ آن 62 ارب روپئی نا ریکوری مس ۔ مسلم لیگ (ن) نا دور اٹی مسہ ایمنسٹی اسکیم بسر ۔ دافتیان 76ہزار آن زیات خلقت فائدہ ہرفیر ۔ ننا دور اٹی اسہ لکھ 24 ہزار آن زیات بندغ دا اسکیم آن فائدہ ہرفیر ۔
