پاک چین اسیجا مشق ’’سی گارڈینز‘‘ نا اڈتننگ ڈیہہ نا امن و سوگوی کن ہڑتوم آ ملک آتا عزم ءِ پین سوگو کیک، امیر البحر ایڈمرل ظفر محمود عباسی
اسلام آباد ۔ 09 جنوری (اے پی پی) امیر البحر ایڈمرل ظفر محمود عباسی پارینے کہ پاک چین بحریہ مشق انا اڈتننگ ڈیہہ نا امن و سوگوی کن ہڑتوم آ ملک آتا عزم ءِ پین سوگو کیک ۔ او مشق ’’سی گارڈینز2020‘‘ اٹی کراچی ٹی چینی بحری جہاز انا دورہ ءِ کننگ نا وخت آ گپ و تران کریکہ ۔ ترجمان پاک بحریہ نا رداٹ چینی بحری جہاز ین چواں نا بننگ آ چیف آف دی نیول اسٹاف ءِ گارڈ آف آنر پیش کننگا ۔ سروک پاک بحریہ چینی بحریہ نا سویلی تھیٹر کمانڈ نا ڈپٹی کمانڈر وائس ایڈمرل ڈانگ ڑن تون اوڑدہی کرے و چندی باندات آتیا گپ و تران کرے ۔ چین نا وائس ایڈمرل ڈانگ ژن چیف آف دی نیول اسٹاف نا ’ین چواں ‘ آ بننگ آ اونا منت واری ءِ ہرفے ۔ امیر البحر ایڈمرل ظفر محمود عباسی پارے کہ مشق سی گارڈینز2020ہڑتوم آ ملک آتا سوگو تعلقداری و تین پہ تینی پت انا درشانی ءِ ۔ ایڈمرل ظفرمحمود عباسی چینی بحریہ نا کارندہ غاتا کسبی لاءخی و قابلیت نا ستاءِ کرے ۔ پاکستان و چین نا بحری فوج آتا نیام اٹ اڈ ہلوک آ ساڑی آ مشق سی گارڈینز 2020ء دا چرجوئی نا شش می کڑی ءِ ۔
