الس ءِ زیات آن زیات آسراتی فراوان کننگ حکومت نا اولیت آتے ٹی اوار ءِ، وزیر خارجہ مخدوم شاہ محمود قریشی
اسلام آباد ۔ 09 جنوری (اے پی پی) وزیر خارجہ مخدوم شاہ محمود قریشی پارینے کہ الس ءِ زیات آن زیات آسراتی فراوان کننگ ننا حکومت نا اولیت آتے ٹی اوار ءِ، و دادے عملی ءُ دروشم اس تننگ کن نن دے و نن کوشست کننگ اُن ۔ داہیت ءِ او پنچ شنبے نادے آ وزارت خارجہ ٹی جوڑ کروک آ پوسکن آ قونصلر ہال انا بناءِ کرسا پارے ۔ سیکرٹری خارجہ سہیل محمود، اسپیشل سیکرٹری معظم احمد خان، ترجمان وزارت خارجہ عائشہ فاروقی و وزارت خارجہ نا سینئر کمامدارآک ہم وزیر خارجہ تون اوار ساڑی ئسر ۔ دا پوسکن آ ہال انا جوڑ کننگ نا مسخت قونصلر سیکشن اٹی دستاویز آتا پک کننگ کن بروک آتے غٹ آسراتی تا فراوانی کن کننگانے ۔ قونصلر ہال انا پیشن خصوصی ’’انتظار گاہ‘‘ اس جوڑ کننگانے تانکہ سوالیک داڑے آرام اٹ تولسا تینا واری نا انتظار ءِ کننگ کیر ۔ شاہ محمود قریشی پارے کہ قونصلر سیکشن اٹی دا پوسکن آ بلڈنگ اٹی ٹوکن جاری کروک آ اسہ پوسکن ءُ مشین اس ہم خلنگانے تانکہ سوالی تا نہادی وخت ءِ بچفنگ مرے و اوفتے درکار آسراتی بیدس وخت زیان کننگ آن دو بننگ کے وخت اس کہ قونصلر سیکشن نا پیشن معذور بندغ آتے کن خصوصی ’’ویل چیئر ریمپ ‘‘ اس ہم جوڑ کننگانے ۔ اوپارے کہ کنے خوشی ءِ کہ وزارت خارجہ نا آفیسر آک پورو تندہی و خلوص نیت اتون ، تینا کسبی خذمت آتے سرانجام تننگ ءُ ۔
