اسلام آباد ۔ 09 جنوری (اے پی پی) ترجمان دفترخارجہ عائشہ فاروقی پارینے کہ ڈیہہ پین جنگ انا سگنگ نا وڑاٹی اف، پاکستان ڈیہہ ٹی امن کن تینا کڑد ءِ ادا کننگ کن تیار ءِ ۔ ڈیہہ ٹی چک و تاڑ اٹی کمتی و امن نا بحالی کن تعلقدار کڑدہ ایران و امریکہ نا کنڈآن ہر کوشست نا ستاءِ کینہ ۔ پاکستان ہچ ءُ جھیڑہ سے ٹی بشخ ہلپک و مدام امن نا شریداری مریک ۔ پنچ شنبے نادے آ ہفتہ وار بریفنگ اٹی ترجمان پارے کہ پاکستان ساڑی آ تران اٹی امریکی صدر ڈونلڈ ٹرمپ نا داہیت آن اتفاق کیک کہ ڈیہہ ٹی امن ءِ بایدے موقع اس تننگے ۔ ترجمان پارے کہ وزیراعظم عمران خان نا پارت آ وزیر خارجہ شاہ محمود قریشی نا کنڈآن مسہ ملک آتا گمانی دورہ نا مسخت ہم ڈیہہ ٹی امن نا بحالی ءِ ۔ اوپارے کہ جنگ اسٹ اسے نا ہم فائدہ ٹی اف ہراڑکن داوخت آ پاکستان کوشست کننگ ءِ ۔ اسہ سوج اسے نا ورندی ءِ ترسا ترجمان پارے کہ پاکستان مدام تناءو ٹی کمتی و سگ انا گرج آ زور شاغسا کرینے ۔ ترجمان پیدوار کرے کہ پاکستان ہچ ءُ جھیڑہ سے ٹی بشخ ہلپک و مدام امن نا شریدار مریک ۔ امریکی سیکرٹری خارجہ و دفاع نا کنڈآن آرمی چیف ءِ ٹیل فون نا بابت اسہ سوج اسے نا ورندی ءِ ترسا ترجمان پارے کہ پاکستان و امریکہ نا نیام اٹ ہڑتوم آ کنڈآتا تعلقداری کیہی سال آتیا تالان ءِ و ہڑتوم آ ملک آتا نیام اٹ چندی کہول و کیہی چیلنج آتا کمک اٹ رابطہ مریک ولے ننا غٹ تر چکار نا وت تعلقداری تے پین سوگو کننگ ناءِ ۔ اوغان عمل نا بابت ترجمان پارے کہ وزیر خارجہ شاہ محمود قریشی تینا غٹ ہم منصب آتون اوڑدہی تیٹی مدام داہیت آ زور شاغانے کہ دے ٹک نیامی ٹی حالیت آتا سوب آن اوغانستان اٹی امن عمل بایدے زہمی مف ۔ ترجمان پاکستان کن انٹرنیشنل ملٹری تعلیم و ہیلکاری پروگرام ءِ سہی کنڈ اٹی اسہ پین گام اس گوندا وپارے کہ وسیع البنیاد سوگو تعلقداری کن داوڑ المی ئس ۔ ترجمان پک کرسا پارے کہ وزیراعظم عمران آخبت اٹی ملائیشیا نا دورہ ءِ کیک و پاکستان تینا ایلم ملک اتون خڑکی رابطہ غاتے ٹی ءِ ۔ اوپارے کہ ترکی نا صدر رجب طیب اردوان فروری ٹی پاکستان نا دورہ غا بریک ۔ بھارتی حکومت نا کنڈآن درملکی سفیر آتا دورہ مقبوضہ کشمیر نا بابت رپورٹ نا بارواٹی ترجمان پارے کہ پاکستان دا اومیت تخک کہ درملکی سفیر آتا دورہ ’’آجو و شفاف ‘‘ مریک و سفیر آتے ہندی کشمیری الس و حریت راہشون آتون ہم آجو رابطہ کننگ نا موکل مریک ۔ ترجمان پارے کہ بھارت مقبوضہ کشمیر اٹی دہشت گردی و خوف انا پوسکن ءُ چرجوئی اس بناکرینے و دامان ءِ دنیا نا غٹ آن بھلا جیل اٹ بدل کرینے ۔ ترجمان سیکرٹری خارجہ سہیل محمود نا لاءخی تا بابت میڈیا رپورٹ آتے مسترد کرے و پارے کہ ساڑی سیکرٹری خارجہ بے کچ لاءخ ، قابل و شاندار سفارتی کیریئر نا حامل ءِ ، ہرا تدوک آ مسہ سال آن ملک اکن خذمت سرانجام تننگ ءِ ۔ چارج ءِ سنبھالنگ آن پد اوکیہی اہم ٹاسک آتے جوانی اٹ سرانجام تسنے ۔
