اسلام آباد۔ 8 جنوری (اے پی پی)مزن وزیر عمران خان (مروچی) چار شمبے ءَ ہنر مندءِ ورناء پروگرام ءِ بنداتی کن انت ایشی ءِ ردا ورناہاں را سہلیں وام دیگ بہ بنت۔آہاں را ہنر مند جوڈ کنگ ءِ ھاترا کسبی پروگرام سٹارٹ اپ ءُُ انٹرن شپ ءِ بنگیجی کنگ بہ بیت۔چار شمبے ءَ مزن وزیر ءِ سروکی ءَ دیوان برجم دارگ بوتگ ایشی ءِ تہ مزن وزیر ءَ را “ہنرمند جوان”پروگرام ءِ سرا بریفنگ دیگ بوتگ۔ دیوان ءِ تہ وزیرِ تعلیم شفقت محمود، ھاسیں کمکار برائے یوتھ افیئرز عثمان ڈار ءُُ ٹوھیں واکداراں بھرزوراتگ۔ھاسیں کمکار برائے یوتھ افیئرز عثمان ڈار ءَ استیں حکومت ءِ نیمگا چہ ورناہانی ھاترا بناء کتگیں لہتیں پروگرام ءَ چہ سرپد کتگ۔اے مراگشءِ تہ ورناہانی ھاترا سہل ءِ وامانی پھجارگ،ورناہاں را ہنر ءُُ زانت دیگ ءِ ھاترا کسبی ہیلکاری ءِ مراگش،اسٹارٹ اپ ءُُ انٹرن شپ وڈیں پروگرام ھوار انت۔ھاسیں کمکارعثمان ڈار ءَ سرپد کتگ کہ آوکیں چارسالانی ھاترا 30ارب کلدار ءِ ھرچ ءَ گوں ہنرمند ورناہ پروگرام ءِ تچکی ءَ گوں برجاہی (مروچی) پنچ شمبے ءَ کنگ بہ بیت۔ وزیرِ تعلیم شفقت محمود ءَ مزن وزیر ءَ وزارت تعلیم، نیشنل ووکیشنل اینڈ ٹریننگ سنٹر ءُُ ہائر ایجوکیشن کمیشن ءِ ردا”ہنر مندجوان”ءُُ “اسٹارٹ اپ”پروگرام ءِ ھوالہ ءَ چہ سرجمیں وڈ ءَ بریف کتگ۔وزیر تعلیم ءَ گوشت کہ ہنر مند جوان پروگرام ءِ اولی بھر بیست ماہ ءِ تہ سرجم بیت ءُُ ایشی ءِ سرا کم ءُُ گیش دھ ارب کلدار ھرچ کائیت۔اے پروگرام ءِ مول ءُُ مراد ورناہاں را نوکتریں ہنر ءُُ زانت ءَ گوں سمبرینگ انت ءُُ ورناہانی ھاترا گیشاں گیش نوکریانی موہ ودی کنگی انت ءُُ آہانی تکنیکی صلاحیت ءَ را میاں اوستمانی معیار ءِ ردا سدکی جوڈ کنگ ءِ ھاترا میاں اوستمانی ادارگہاں گوں رھوت ءُُ لنک قائم کنگی انت۔استعدادِ کار ءِ تہ ودکی ءِ ھوالہ ءَ چہ مزن وزیر ءَ را سرپد کنگ بوتگ کہ ہنرمند ورناہ پروگرام ءِ اولی بھر ءِ تہ یک لکھ ستر ہزار ورناہاں را ہنر ءَ گوں سمبرینگ ءِ سرا دلگوشی دیگ بہ بیت۔آہاں چہ پنجاھ ہزار ورناہاں را نوکتریں بودایشی ءِ تہ آرٹیفیشل انٹیلی جنس، روبوٹکس،کلاؤڈ کمپیوٹنگ وڈیں نوکتریں علم ءُُ زانت ھوار انت آئی ءِ تہ ہیلکاری دیگ بہ بیت۔پنجاھ ہزار ورناہاں را ٹیوٹا ءِ ادارگہاں رسمی تک ءِ تہ (آٹو مکینک، پلمبر) ہیلکاری دیگ بہ بیت آہاں را جانچ ءِ پدا سرٹیفیکیٹس دیگ بیت تنکہ آہانی صلاحیتانی ھوالہ چہ آہانی کرءَ کاگدی ثبوت انت۔مزن وزیر ءَ را حال دیگ بوتگ کہ اے مراگش ءِ ردا ملک ءِ تہ نیشنل اکریڈیٹیشن کونسل ءِ قیام عمل آرگ بہ بیت۔ ٹیوٹا ءِ دو ہزار ادارگہانی ایکریڈیٹیشن کنگ بہ بیت۔کسبی ہیلکاری ءِ ھوالہ چہ معیار ایر کنگ بہ بنت تنکہ ملک ءِ تہ کسبی تعلیم ءِ یکساں نصاب ءُُ معیار ءَ سدکی جوڈ کنگ بہ بیت۔ہنر ءُُ پیشہ وارانہ تعلیمءِ تاں رسائی ءَ را سدکی جوڈ کنگ ءِ ھاترا 75سمارٹ کلاس رومز ہڈ دیگ بہ بنت۔ایشی ءِ ھواری ءَ (70) مدارسءِ تہ ھم تکنیکی تعلیم ءِ پھجارگ ءِ انتظام کنگ بہ بیت۔مزن وزیر ءَ را سرپد کتگ کہ دوست ملکانی کمک ءَ گوں پنچ سنٹر آف ایکسیلینس ہڈ دیگ بنت۔ٹیوٹا انسٹی ٹیوٹس ءِ بین الاقوامی ادارگہاں گوں ہمگرنچ کنگ بہ بیت۔ورناہانی ھاترا نوکری ودی کنگ ءَ را سدکی کنگ ءِ ھاترا مزن وزیر ءَ را “اسٹارٹ اپ”پروگرام ءِ سرا سرجمیں بریفنگ داتگ۔مزن وزیر ءَ ورناہانی ھاترا لہتیں پروگرامانی برجاہی ءِ سرا تسلہ ءِ درشان کتگ ءُُ گوشت کہ ورناہ ملک ءِ راستیں مڈی انت۔آہاں گوشت کہ بدبہتی ءَ گوں معیار ءُُ کوالٹی ءِ سرا عدم توجہ ءَ گوں ورناہانی تعلیم ءُُ ہنر زورگ ءِ ابید ھم مارکیٹ ءِ تہ نوکری زورگ ءَ اڑاند دیما انت۔ تکنیکی ءُُ پیشہ وارانہ تعلیمی ادارگہانی تہ ٹیکنالوجی ءِ پراھی ءِ سرا گپ جنان ءَ مزن وزیر ءَ گوشت کہ پاکستان ءَ را دیم جیڈھ ءِ حل ٹیکنالوجی ءَ را گیشاں گیش کارمرز کنگ ءَ چیر انت۔آہاں گوشت کہ تکنیکی ادارگہانی تہ برز تکی معیار ءَ را سدکی جوڈ کنگ ءَ ارزشت ءِ سرا ھاسیں زور مان کتگ۔مزن وزیر ءَ گوشت کہ تعلیم ءِ ابید ورناہاں را مارکیٹ ءِ تہ نوکری زورگ ءِ تہ اڑاند ٹیکنیکل ءُُ کسبی ادارگہانی معیار ءِ سرا جست برز کنگ انت ایشی ءِ سرا زوت دلگوشی دیگ ءِ ضلورت انت۔آہاں گوشت کہ نوکتریں علم مثلاً آرٹیفیشل انٹیلیجنس ءِ سرا ھاسیں دلگوشی دیگ بہ بیت تنکہ ورناہ اودا ملکی جوڈءُُ جاڑی ءُُ دیمروئی ءِ تہ چکاریں کرد ءَ ادا کت کن انت اودا میاں اوستمانی ادارگہاں وتی صلاحیت آنی شریں کارمرزی کت کن انت۔
