اسلام آباد۔ 08 جنوری (اے پی پی) وزیر خارجہ مخدوم شاہ محمود قریشی پارینے کہ ایرانی وزیر خارجہ نا بے چیٹی تیٹی ودکی کپننگ نا بیان پامداری نا درشانی ءِ، حالیت آتیا ڈیہہ نا چندی ملک آتا وزیر خارجہ غاتون رابطہ مسنے، ڈیہہ بے چیٹی و جنگ انامتحمل مننگ کپک، ممکنہ جنگ انا جہانی زرگزران آزہم تمک، بھارت اٹی حالیت آک پدریسہ خراب مرسا ہِننگ ءُ، واک انا کاریم اٹ اتنگ آن باندات آک تو بگڑینگ انگ کیرہ، سہی مننگ کپسہ۔ چارشنبے نادے آ وزارت خارجہ غان جاری بیان نا رداٹ وزیر خارجہ شاہ محمود قریشی ساڑی آ ایران امریکہ بے چیٹی تا بابت پارینے کہ تدوک آ نن ہرا جلہو مسنے او اونا جاچ ءِ ہلنگ ءِ۔ بنائی حوال آتارداٹ ہچ ءُ جانی نسخان اسے نا حوال مون آ بتنے۔ اگہ ایران نا وزیر خارجہ جواد ظریف نا ساڑی آ بیان ءِ ہُننگے تو اوپارینے کہ ایران بے چیٹی تے ودفنگ خواپک۔ دا بیان پامداری نا درشانی ئس۔ اوپارے کہ ای سمجھیوہ کہ امریکہ ہم بایدے خیال کے۔ کنا دا چرجوئی ٹی ڈیہہ نا چندی وزیر خارجہ غاتون رابطہ مسنے۔ استو نا نن کنا قطر انا وزیر خارجہ تون ہم سرجم گپ و تران مس او 3جنوری نا واقعہ غان پد تہران نا دورہ ءِ ہم کرے۔ اوپارے کہ ننا غٹ انا کوشست ءِ کہ ڈیہہ ٹی بے چیٹی تیٹی ودکی مف حالیت آتے ٹی ٹھہراؤ ودی مرے انتئے کہ دا ڈیہہ بے چیٹی و جنگ انا متحمل مننگ کپک جنگ ہچ کس نا فائدہ ٹی اف دانا جہانی زرگزران آ زہم تمک۔ ای دا چرجوئی ٹی سرجم بیان سینیٹ و قومی اسمبلی ٹی ہم تسونن ولے انتئے کہ داحالیت آک داسکان بے پک ءُ ہنداخاطران گڑاس پاننگ وخت آن مست مریک۔ وزیر خارجہ پارے کہ امریکہ ٹی ہم اسہ بھاز بھلو تپہ اس جنگ انا مخ تف و امریکی فوج ءِ اسہ پوسکن ءُ جنگ اسے ٹی بِٹنگ نا است خواہ افس، ولے ہڑتوم آ آراک داوخت آ ساڑی ءُ۔ پاکستان نا است خواہی دادے کہ حالیت آک بگڑینگپس و دا ڈیہہ جنگ انا پوسکن آ دلدل اٹ اختہ مف۔ پاکستان امن نا خواہندار ءِ پاکستان سمجھک کہ دا باندات آک ہیت وگپ انا کمک اٹ ایسر مریر۔ اوپارے کہ پاکستان سمجھک کہ حالیت آتے سہی کننگ کن اقوام متحدہ، سیکورٹی کونسل و جہانی برادری دمدستی تینا کڑد ءِ ادا کیر۔ کنا دا حالیت آتیا پارلیمنٹ اٹی تروک آ بیان حکومتی موقف ءِ ہراوزیراعظم نا سلابت اٹ تننگا۔ بھارت اٹی حالیت آک پدریسہ بگڑینگسا ہِننگ ءُ مودی سرکار ءِ السی ردعمل نا دا شدت نا کساس الوکہ۔ وزیر خارجہ پارے کہ بھارت مقبوضہ جموں و کشمیر اٹی ظلم و بربریت نا بازار ءِ گرم کرے اودے کمیونیکیشن بلیک آؤٹ، انٹرنیٹ آ پابندی و میڈیا نا داخلہ غا پابندی خلسا اودے دنیا نا نظرآن اودیم تخا۔ ولے ہراتم اوفک ترمیمی شہریت ایکٹ و این آر سی نا جھیڑہ ئی کانود ءِ مسلط کننگ نا کوشست کریر تو مچ آ ہندوستان بش مس۔ نم خنارے کہ آر ایس ایس نا بدمعاش آک اول جامعہ ملیہ و علی گڑھ یونیورسٹی نا طالب علم آتے بیدادی نا شست کریر و داسہ جواہر لعل نہرہ یونیورسٹی ٹی ہراوڑ دا غنڈاک طالب علم آتے بیدادی نا شست کریر اونا برخلاف مچ آ ہندوستان اٹی طالب علم آک سراپا برانز ءُ ولے بھارت سرکاری داسکان واک ا نا کمک اٹ توننگ نا پالیسی آ روان ءِ۔ شاہ محمود قریشی پارے کہ دا داخلی حالیت آتیان چکار ءِ اسہ کنڈ کننگ کن او بھاز انگا چم آتے آزموندہ کننگ ءِ ہنداخاطران نن بھارت نا کنڈآن فالس فلیگ آپریشن نا خطرہ نا درشانی ءِ کرین۔ ہراوڑ اوفک کرتار پور واقعہ ءِ ودفسا و حالیت و واقعہ غاتے ہراوڑ توڑ موڑ کر پیش کننگ نا کوشست کریر او ہم نما مون آٹے انتئے کہ او بیرہ دروغ انا پروپیگنڈا اس ئس ہنداخاطران دم تس۔ اقلیت آتا عبادت گاہ تا رکھ انا بابت پاکستان نا پالیسی بالکل پیدوار ءِ۔ پاکستان تینا سکھ برادری کن کرتار پور راہداری ءِ ملنگ اٹ ہرا کڑد ءِ ادا کرے او غٹ انا مون آ ٹے۔ بھارت اٹی حالیت آک بے کچ تشویشناک ءُ و حکومت ہبکہ نا گواچی ءِ۔ نن سمجھنہ کہ واک انا کاریم اٹ اتنگ آن باندات آک بگڑینگرہ سہی مننگ کپسہ۔
