کوئٹہ۔ 07 جنوری (اے پی پی) وزیراعلیٰ بلوچستان جام کمال خان پارینے کہ مسکوہی نا غلط شونداری فیصلہ غاتیا عملدرآمد عملی وڑاٹ ممکن اف، دُن انگا ڈٹ آتیا نظر شاغسا اوفتے عمل نا قابل کننگ نا گرج ءِ تانکہ اوفتا بھرمک الس اسکان سرمننگ کیر، داخیال آتا درشانی ءِ او جان جوڑی نا بشخ انا چندی اہم ڈٹ آتا بابت باندات آتا جاچ ءِ ہلسا اوفتے حتمی دروشم اس تننگ کن اڈ ہلوک آ دیوان اٹی کرے، صوبائی وزیر خزانہ میر ظہور بلیدی، سیکرٹری جان جوڑی، سیکرٹری مواصلات، سیکرٹری خزانہ، سیکرٹری ہائیر ایجوکیشن و ایلو تعلقدار کمامدارآک ہم دیوان اٹی ساڑی ئسر۔ دیوان ءِ خضدار میڈیکل کالج و تربت میڈیکل کالج نا ڈغار، لورالائی میڈیکل کالج و کوئٹہ ڈینٹل کالج نا ماڑی تا سمارٹ ڈیزائن و د ا ادارہ غاتا رداٹ علاقہ غاتا آبادی کن تروک آ آسراتی تا جاچ ءِ ہلنگا، وزیراعلیٰ پارے کہ باندات آتے وسیع رداٹ ہُننگ نا گرج ءِ و آخبت نا خواست آتے مون آ ختسا فیصلہ بایدے ہلنگے تانکہ خاطرخواہ و دورس بھرم دوئی مرے۔ میڈیکل کالج آتا اڈتننگ اٹ غٹ تیکنیکی پہلوتے مون آتخسا استاد و ایلو اسٹاف نا حاضری ءِ پک کرسا داخلہ ہلوک آ طالب علم آتا کچ ءِ ہائر ایجوکیشن نا آب انا رداٹ پک کننگے تانکہ حکومت نا کنڈآن دا بشخ اٹی مروک آ زرکاری نا مثبت زہم و بھرم تیان الس فائدہ ہرفنگ کے، وزیراعلیٰ پارے کہ صوبہ ٹی ساڑی یونیورسٹی تے گچین کننگ نا گرج ءِ وخت اس کہ صوبہ ٹی پین میڈیکل کالج آتا اڈتننگ آن بلوچستان نا طالب علم آتے طب انا بشخ اٹی تینا لائخی تے منفنگ نا موقع ملنگ کیک، وزیراعلیٰ میڈیکل کالج آتا گچین آب ءِ پک کننگ نا پارت کرے۔ دیوان ءِ 1395.86 ملین روپئی نا خڑچ آن جوڑ کروک آ کوئٹہ ڈینٹل کالج نا سلاہ ئی ماڑی نا پریذنٹیشن تننگا۔ دیوان اٹی خضدار میڈیکل نا جاری ڈٹ انا بابت ایڈیشنل چیف سیکرٹری ڈٹ بندی و شونداری نا کماشی ٹی کمیٹی اس جوڑ کننگ، لورالائی میڈیکل کالج و پنچ سد کٹ ہسپتال نا ڈٹ آتے کن ہم کمیٹی اس ٹہیفنگ نا فیصلہ کننگا وخت اس کہ سیکرٹری جان جوڑی ءِ کوئٹہ ڈینٹل کالج نا ڈیزائن نا اول سر آن جاچ ءِ ہلنگ نا پارت کننگا، وزیراعلیٰ پارے کہ دا ڈٹ آتے آخبت اٹی ودفسا نرسنگ ادارہ و ایلو المی طبی آسراتی تا فراوانی ءِ پک کننگک۔
