اسلام آباد۔ 07 جنوری (اے پی پی) قومی اسمبلی فوجی سروک آتا ملازمت نا مد انا بابت ہر مسٹ آ بل آتا منظوری ءِ تسنے ہرانا رداٹ چیف آف آرمی اسٹاف، چیئرمین جائنٹ چیفس آف اسٹاف کمیٹی، پاک فضائیہ نا سروک و پاک بحریہ نا سروک آتا تقرری یا اوفتا عہدہ نا مد اٹی ودکی ءِ ہچ ءُ عدالت اسے ٹی چیلنج کننگ مفک و بل انا رداٹ بری، بحری و پاک فضائیہ نا سروک و چیئرمین جوائنٹ چیفس آف اسٹاف کمیٹی نا چیئرمین نا ملازمت نا مد اٹی وزیراعظم نا ایڈوائس آ صدر مملکت مسہ سال اکن دُوارہ تقرری ءِ کننگ کیک۔ بل انا رداٹ آرمی ایکٹ نا سیکشن 8 اے انا رداٹ وزیراعظم نا ایڈوائس آ صدر ممملکت مسہ سال اکن جنرل رینک انا آفیسر ءِ چیف آف اسٹاف و چیئرمین جوائنٹ چیفس آف اسٹاف کمیٹی نا تقرری ءِ کننگ کیک۔ بل انا رداٹ شق 8 بی انا رداٹ تعینات آرمی چیف نا دُوارہ تقرری نا وڑوڈول ءِ وضع کننگانے ہرانا رداٹ قومی سلامتی نا فائدہ غاتا رکھ اکن وزیراعظم پاکستان نا ایڈوائس آ صدر مملکت پین مسہ سال اکن چیف آف آرمی اسٹاف نا تقرر یا اوفتا عہدہ غاتا معیاد اٹی ودکی کننگ کیک۔ بل انا رداٹ چیف آف آرمی اسٹاف نا تقرری یا اونا عہدہ نا مد اٹی ودکی ءِ اسہ عدالت اسے ٹی ہم چلینج کننگ مفک۔ بل انا شق 8 سی انا رداٹ آرمی چیف نا عہدہ نا ریٹائرمنٹ و ملازمت نا دنگ انا تعین ءِ کننگانے۔ دا شق انا رداٹ ریٹائرمنٹ نا وئی و جنرل اسے نا ملازمت نا مد انا شڑت و محدودآتا تعین چیف آف آرمی اسٹاف یا آرمی چیف نا عہدہ ٹی ودکی نا رداٹ مفک، بشرطیکہ اونا وئی 64سال آن زیات مرے۔ ترمیمی بل انا شق 8 بی اٹی چیئرمین جوائنٹ چیف آف اسٹاف کمیٹی نا تقرری نا وڑوڈول ءِ طے کننگانے۔ دانا رداٹ صدر مملکت وزیراعظم پاکستان نا ایڈوائس آ پاکستان آرمی نا جرنیل، پاکستان نیوی نا ایڈمرلز یا پاکستان ایئر فورس انا ایئر چیف مارشل آتیان اسٹ اسے نا مسہ سال انا مد اکن تقرر ءِ کننگ کیک۔ پاکستان ایئر فورس (ترمیمی) ایکٹ 2020ء نا رداٹ صدر مملکت وزیراعظم نا مشورہ اٹ چیف آف دی ایئر اسٹاف نا دُوارہ تقرر ءِ مسہ سال انا ودکی مد اکن کننگ کیک یا چیف آف ایئر اسٹاف نا معیاد اٹی مسہ سال اکن ودکی کننگ کیک، دُن انگا قیود و شڑت آتیا ہرافتا تعین صدر مملکت، وزیراعظم نا مشورہ اٹ، قومی سلامتی نا فائدہ ٹی یا وقتا فوقتا ہلہلہ ئی حالیت آتے ٹی کے۔ دا رداٹ تقرر کروک آ اتھارٹی نا کنڈآن صوابدید نا کاریم اٹ اتنگ آ عدالت اسے نا روبرو سوب اسے آن ہچ ءُ اعتراض اس کننگپک۔ پاکستان نیوی ایکٹ (ترمیمی) بل 2020ء نا رداٹ صدر مملکت وزیراعظم نا مشورہ اٹ پاک بحریہ نا سروک نا دُوارہ تقرر ءِ مسہ سال اکن کننگ کیک۔ دُوارہ تعیناتی یا تقرری کن زیات آن زیات وئی نا حد 64سال مقرر کننگانے۔ سے شنبے نادے آ قومی اسمبلی ٹی وزیر دفاع پرویز خٹک ایوان اٹی بل پیش کننگ آن مست پیپلزپارٹی آن خواست کرے کہ ایوان اٹی یکجہتی نا چاگڑد اس ودی کننگ کن او تینا سلاہ تے پدی ہلے ہراڑا پیپلزپارٹی نا پارلیمانی لیڈر سید نوید قمر پارے کہ او بل ءِ گچین کننگ کن سلاہ تسوسر ولے ملک و ڈیہہ نا حالیت آتے مون آ تخسا فیصلہ کرینو کہ نن تینا ترمیم آتیا زور شاغپنہ اوکان پد وزیر دفاع پرویز خٹک بل انا منظوری کن تحریک ءِ پیش کرے۔ ایوان آن تحریک نا منظوری آن پد اسپیکر ایوان آن اسٹ آن پد ایلو بل آتا غٹ شق آتا منظوری ءِ دوئی کرے۔ اوکان پد وزیر دفاع پرویز خٹک پاکستان آرمی (ترمیمی) بل 2020ء نا منظوری نا تحریک پیش کرے ہرانا ایوان منظوری ءِ تس ولے داٹی متحدہ مجلس عمل نا بل انا اولیکو خواندگی آن مست ایوان آن واک آؤٹ کریر و اوفک بل آ سلاہ شماری ٹی بشخ ہلتوس۔ اوکان پد وزیر دفاع پرویز خٹک پاکستان ایئر فورس (ترمیمی) بل 2020ء و پاکستان نیوی (ترمیمی) بل 2020ء نا اسٹ آن پد ایلو منظوری کن تحریک آتے ایوان اٹی پیش کرے دا ہڑتوم آ بل آتے ہم قومی اسمبلی آن منظوری دوئی مس۔
