اسلام آباد۔ 07 جنوری (اے پی پی) وزیراعظم نا خصوصی کمکار حوالکاری و شین کاری ڈاکٹر فردوس عاشق اعوان آرمی ایکٹ اٹی ترمیم آتا بل قومی اسمبلی آن منظور مننگ آ غٹ سیاسی جماعت آتے خراج تحسین پیش کرسا پارینے کہ ملکی رکھ اتون گنڈوک اہم کانود سازی آ سیاسی جماعت آک اتفاق و بردباری نا درشانی ءِ کریر، اینو ثابت مس کہ ہراتم کہ ملک آ مشکل وخت برے غٹ سیاسی جماعت آک یکجا مریرہ، سیاسی باندات آتیا اختلاف رائے جمہوریت نا زیبائی ءِ، ہراتم کہ ملک انا قومی سلامتی و فائدہ غاتا ہیت بریک تو غٹ سیاسی جماعت آک یکجا مریرہ۔ پیپلزپارٹی خاص کر تحسین نا حقدار ءِ ہراقومی فائدہ غاتے ٹی تینا سلاہ تے پدی ہلک۔ مخالف آک بنر، ملکی فائدہ غاتا معاملہ ٹی غٹ سیاسی جماعت آک یکجا ءُ، پارلیمنٹ الس نا عدالت اٹی سرسہب مرسا کیک، پاکستان نا مخالف آتا پروپیگنڈا ءِ پارلیمنٹ کھڈ کرے، پارلیمنٹ اوفتا ارمان تے مش تا کرے۔ او سے شنبے نادے آ پارلیمنٹ ہاؤس نا پیشن سینیٹ نا قائمہ کمیٹی حوالکاری و شین کاری نا چیئرمین سینیٹر فیصل جاوید تون اوار میڈیا تون گپ و تران کریکہ۔ ڈاکٹر فردوس عاشق اعوان پارے کہ اینو پاکستان نا پارلیمان نا تہہ ٹی اہم کانود سازی آ سیاسی جماعت آک بردباری نشان تسر، ہرا دا ہیت انا عکاسی ءِ کیک کہ ہراتم چیلنج اس مون آ بریک تو غٹ سیاسی جماعت آک و سرکڑدہ غاک سیاسی فائدہ غاتیان پیش تمسا قومی فائدہ غاتے اولیت ایترہ، سیاست نا محاذ آ اختلاف رائے تخنگ جمہوریت نا زیبائی ءِ، سیاسی جماعت آک اسہ ایلو آ تنقید کرسا کیرہ ولے ہراتم قومی فائدہ غاتا ہیت بریک تو غٹ سیاسی جماعت آک سیاسی فائدہ غاتے پدی ہلسا پاکستان تون سلرہ۔ اوپارے کہ غٹ سیاسی جماعت آتے خراج تحسین پیش کیوہ، پیپلزپارٹی سلاہ ئی ترمیم قومی فائدہ غاتے ٹی پدی ہلک، اوحب الوطنی نا شاہدی ءِ تسر، اینو امنائی کانود سازی نا تاریخ ساز ءُ دے اس ئس، پاکستان نا مخالف آک خن تے ملر ہریر، دا یکجہتی پارلیمنٹ آن نظر برسا کیک، دا یکجہتی نا فضابایدے پین مون آ کائے، الس نا ڈکھ آتا مداوا مرے، دا مشکل آتا چٹفنگ نا سال ءِ، داڑان عمل ءِ ریلیف ملک، پارلیمنٹ الس نا عدالت اٹی سرسہب مرسا کیک۔ ڈاکٹر فردوس عاشق اعوان پارے کہ پاکستان نا ہرا داوخت آ پیشن نا محاذ آ تیا قومی سلامتی نا چیلنج مون تروک ءِ، پاکستان نا مخالف آک ایف اے ٹی ایف نا تہہ ٹی انت سازش کننگ ءُ، داڑتون اوار ہر نن قومی چیلنج آ ہنداوڑ نا یکجہتی نا درشانی ءِ کرسا کینہ۔ اوپارے کہ ادارہ غاتا تہہ آن کرپشن نا چٹفنگ ہم قومی سلامتی نا اہم ءُ بشخ اسے۔ کرپشن نا چٹفنگ کن ایجنڈا نارداٹ ادارہ غاک تینا کاریم ءِ کرسا کیرہ۔ اوپارے کہ قائمہ کمیٹی تیٹی غٹ جماعت آتا نمائندگی مریک، اپوزیشن آخبت اٹی ہم تینا سلاہ تے اتے او قوم انا فائدہ ٹی مسر تو حکومت او ترمیم آتے منظور کرفک۔ فردوس عاشق اعوان پارے کہ احتساب ملک و قوم انا گرج ءِ۔ داوخت آ پاکستان تحریک انصاف نا راہشون فیصل جاوید خان پارے کہ ستاکڑزوک ءُ ہیت اسے کہ امنائی اٹ بل پاس مس، گڑاس ہندن ءُ کانود سازی مریک ہرافتے مرغن چکنگک۔ زینب الرٹ بل کمیٹی ٹی اختہ ئس ہرادے چار تُو آن پد پارلیمنٹ آ گدریفنگانے۔
