اسلام آباد۔ 07 جنوری (اے پی پی) پاک بحریہ نا اِرا جہاز ’کمکار‘ و ’اصلت خیرخواہی مشن آ افریقہ نا چندی ملک آتا دورہ ءِ کرسا تنزانیہ غا سرمس، بندرگاہ دارالسلام آ سرمننگ آ میزبان بحریہ پاک بحریہ نا جہاز آتے جم و جوش اٹ بخیر کرے۔ ترجمان پاک بحریہ نا رداٹ پاک بحریہ نا جہاز آتے ٹی تنزانیہ ٹی میڈیکل کیمپ اس اڈ تننگا، ہراڑے ہزار آ بندغ آتے درمان، آپریشن و دوائی تا آسراتی فراوان کننگا۔ تنزانیہ نا الس پاک بحریہ نا خیر سگالی نا دا گام انا بھلو کچ اسے آ ستاءِ کریرو پاکستان ءِ خراج تحسین پیش کریر۔ مشن کمانڈر چیف آف تنزانین نیوی تون اوار تنزانیہ نا بڑزکو کمامدارآتون اوڑدہی کرے و ہڑتوم آ کنڈآتا بحری کمکاری ءِ مون آ دننگ آ گپ و تران کرے۔ دورہ ٹی ڈیہہ ٹی سمندری رکھ اکن پاک بحریہ نا کڑد ءِ تالان کننگا۔ پاک بحریہ نا جہاز آ اڈ ہلوک آ سوارہ ٹی میزبان بحریہ نا بڑزکو کمامدار، سفارتی و ہندی شخصیت آک بھلو کچ اسے ٹی بشخ ہلکر۔ داوخت آ مقبوضہ کشمیر اٹی بھارتی ظلم و اوڑا پاکستانی موقف ءِ ہم تالان کننگا۔ دورہ نا مسخت پاکستان نا بیانیہ، ہڑتوم آ کنڈآتا بحری کمکاری و انسانی ہمدردی نا جوزہ ءِ مون آ دننگ نا ءِ۔
