پیپلز میڈیکل ہسپتال نواب شاہ نا میڈیکل سپرنٹنڈنٹ وزیراعظم ئِ ٹھپی تا درمان نا بابت معلومدار کرے
نواب شاہ۔ 17 فروری (اے پی پی) وزیراعظم محمد نواز شریف درگاہ لعل شہباز قلندر نا سانحہ ٹی ٹھپی مروک آ بندغ آتا جان پڑسی کن پیپلزمیڈیکل ہسپتال نواب شاہ نا دورہ ئِ کرے۔ سانحہ ٹی 80 آن بندغ شہید مسوسر۔ بری فوج انا سروک جنرل قمر جاوید باجوہ ، وزیر خزانہ سینیٹر اسحاق ڈار، وزیر داخلہ چوہدری نثارعلی خان ، گورنر سندھ زبیر احمد، وزیراعلیٰ مراد علی شاہ، سینئر سیاسی و انتظامی کمامدار آک وزیراعظم تون اوار ئسر۔ ہسپتال نا میڈیکل سپرنٹنڈنٹ وزیراعظم ئِ ہسپتال اٹی اتوک آ ٹھپی و اوفتا درمان نا بابت معلومدار کرے۔ وزیراعظم ہستپال نا کیہی وارڈآتا دورہ ئِ کرے۔ ٹھپی مروک آتون اوڑدہی کرے و اوفتے ہروڑگچین درمان نا یخین ترفے۔ اوواقعہ نامذمت ئِ کرے و نہادی جان تا نسخان آ ڈکھ و است ہسونی نا درشانی ئِ کرے۔ اوپارے سنگین ڈوہ اٹی اوار ڈوہدار تا تعاقب و اوفتے اوفتا کروک نا سزا تننگ کن ہروڑگام گیج کننگک۔
