اسلام آباد۔ 07 جنوری (اے پی پی) برطانیہ ٹی تعینات پاکستانی ہائی کمشنر محمد نفیس زکریااقوام متحدہ آن خواست کرینے کہ او سلامتی کونسل نا قرارداد آتا رداٹ کشمیری تے حق خودارادیت تننگ نا بابت تینا زمواری و وعدہ ءِ پورو کے۔ اوداہیتءِ تدوک آ دے ہائی کمیشن اٹی جموں و کشمیر نا الس کن حق خودارادیت دے انا وخت آ برٹش پاکستانی و کشمیری پردیسی تا مچی آن تران کرسا پارے۔ ہائی کمشنر اقوام متحدہ غا زور شاغا کہ او مقبوضہ کشمیر اٹی انسانی حق انا سنگین خلاف ورزی، کودک کشمیری تیا کوزہ گر فورس آتا کنڈآن ظلم انا بابت بھارت نا برخلاف سخت کارروائی کے۔ دود اٹی بشخ ہلوک آک کشمیری الس تون پبی یکجہتی نا درشانی ءِ کریر و حق خودارادیت کن کشمیری الس نا جہد نا پبی مخ تفی ءِ کریر۔ نفیس زکریا بشخ ہلوک آتے کشمیر نا جھیڑہ و سلامتی کونسل نا قرارداد آتیا عملدرآمد مفننگ نا نتیجہ ٹی انسانی المیہ نا بابت بریف کرے۔ اوجہانی برادری آ زور شاغا کہ او مقبوضہ کشمیر اٹی کشمیری الس نا خونریزی ءِ توننگ کن دمدستی مداخلت و اوفتے انصاف فراوان کے۔
