ہری پور۔ 06جنوری (اے پی پی) بنجائی وزیر توانائی، پٹرولیم و قدرتی وسیلہ عمر ایوب خان یونین کونسل مانکرائے نا چار خلق آتے کن سوئی گیس انا فراوانی نا ڈٹ انا بناءِ کرینے۔ ڈٹ آ 5 کروڑ 58 ہزار روپئی خڑچ بریک۔ دا بابت بنائی دود اس اڈ ہلک ہراٹی علاقہ نا سرکڑدہ غاتون اوار بنجائی وزیر عمر ایوب خان یونین کونسل مانکرائے نا موضع جات، مکھن، دوبندی، جامعہ اتمان و جوگی موہڑہ کن 5 کروڑ 58 ہزار روپئی نا خڑچ آن گیس انا فراوانی نا ڈٹ انا باضابطہ بناءِ کرے و پارے کہ نن وعدہ غاتیا آخا بلکن عملی کاریم آ باور کینہ، ہندا سوب ءِ کہ گچین کاری مہم اٹی الس تون اخس وعدہ کرین الحمد اللہ اسٹ اسٹ کرسا اوفتے پورو کننگ اُن۔ داوخت آ علاقہ نا سرکڑدہ غاک گیس ڈٹ انا بناءِ کننگ آ عمر ایوب خان نا دلی منت واری ءِ ہرفیر۔
