کوءٹہ ۔ 03 جنوری (اے پی پی) صوبائی وزیر داخلہ میر ضیاء اللہ لانگو پارینے کہ اونا حکومت ءِ گیس انا فراوانی ٹی مون تروک مشکل آتا پورو احساس ارے و او دا ویل ءِ ایسر کننگ کن ہروڑ کوشست کننگ ءِ صوبائی وزیر دا بابت سوئی سدرن گیس کمپنی نا جنرل منیجر صدیق مدنی تون اوڑدہی ٹی تینا و صوبائی حکومت نا کنڈآن بھاز گڑتی نا درشانی ءِ کرے و اودے پارے کہ گیس انا عدم فراوانی و پریشر اٹی کمتی لس بندغ کن حساس ءُ معاملہ اسے و اودے اولیتی بنداو تیا ایسر کننگے جنرل منیجر ایس ایس جی سی وزیر داخلہ ءِ باوری کرفے کہ ویل ءِ ایسر کننگک، اوپارے کہ اونا کمپنی نا خلقت ءِ گرج انا رداٹ گیس فراوان کننگ ءِ ولے کوءٹہ نا مر مر انگا علاقہ غاتے ٹی پریشر نا کمتی نا ویل ءِ ہرادے ہم زوت آن زوت ایسر کننگک ۔ وزیر داخلہ قومی کہول آ آرمی چیف نا ملازمت نا مد اٹی ودکی کن سیاسی جماعت آتا نیام اٹ ودی مروک آ اتفاق رائے نا خیرمقدم ءِ کرے و پارے کہ اپوزیشن جماعت آتا کنڈآن آرمی ایکٹ اٹی ترمیم نا مخ تفی ستاکڑزک، داڑان جمہوریت سوگو مننگ تون اوار اوار پاک فوج و خاص وڑاٹ آرمی چیف نا بابت قوم انا مشترکہ جوزہ غاتا ترجمانی مریک ۔
