فیصل آباد/اسلام آباد ۔ 03جنوری (اے پی پی) فیصل آباد انڈسٹریل اسٹیٹ ڈویلپمنٹ اینڈ مینجمنٹ کمپنی (فیڈمک ) نا چیئرمین میاں کاشف اشفاق پارینے کہ پاکستان زرکاری کن پرکشش ءُ ملک اس جوڑ مسنے ، علامہ اقبال انڈسٹریل سٹی ٹی برآمدی صنعت آتون اوار ہروڑنا زرکاری کروک آتے گچین آسراتی فراوان مریک ، ملکی برآمد و نہادی زرمبادلہ ٹی نمان ودکی مریک، ادارہ غاتا سوگوی، معاشی سوگوی و الس ءِ نیزگاری آن کشسا اوفتا زند انا آب ءِ بڑز کننگ وزیراعظم عمران خان نا پالیسی و اونا معاشی وژن ءِ ۔ اوداہیت ءِ جمعہ نادے آ سی پیک نا رداٹ خصوصی اقتصادی زون نا اولیتی میگا پروجیکٹ علامہ اقبال انڈسٹریل سٹی نا بنداو نا وخت آ سینئر صحافی و اینکرپرسن آتے حوال ترسا پارے ۔ اوپارے کہ وزیراعظم عمران خان نا متحرک کماشی ٹی حکومت الس نا ویل آتا ایسری و ملک ءِ مون تروک چیلنج آتامقابلہ ءِ کننگ کن پرعزم ءِ ۔ برآمدی صنعت آتیان ملکی برآمدات و نہادی زرمبادلہ ٹی نمان ودکی مریک ۔ میاں کاشف پارے کہ فیڈمک نا وڑآ پین خصوصی اقتصادی زون جوڑ کننگ نا بھاز ضرورت ءِ انتئے کہ دا ڈٹ آتیان ملکی برآمد آتے ٹی اسٹ آن یک و نیم ڈالر سالانہ ودکی مریک ۔ اوپارے کہ فیڈمک پبلک پرائیویٹ پارٹنر شپ انا گچین امتزاج ءِ و سی پیک نا رداٹ دا ملکی شونداری ٹی معاشی انجن نا کڑد ءِ ادا کیک ۔ اومستی پارے کہ فیصل آباد پاکستان نا است اٹی بے کچ اہم ءُ جاگہ سے آ ٹی ءِ و دے ٹکی و دیکی کنڈآتیان گدرینگوک آ اِرا موٹرویز اتون گنڈوک ءِ ۔ دا شار ءِ دا جتا اعزاز دوئی ءِ کہ دانا ٹیکسٹائل نا برآمد آتے ٹی بشخ 60 درسد و ملک انا جم برآمد آتے ٹی 45درسد ءِ ۔ دا شار بیرہ ٹیکسٹائل اسکان محدود اف بلکن داڑے جوڑ کیمیکلز ، سٹیل، فوڈ پراسیسنگ و ایلو سد آ ایس ایم ایز ہم ملکی زرگزران اٹی اہم کڑد ادا کننگ ءُ ۔ فیڈمک نا چیئرمین مستی پارے کہ چین، ترکی، کوریا و برطانیہ نا زرکارآک داوخت اسکان یک و نیم ارب ڈالر نا زرکاری کرینو و پاکستان آ اوفتا پت بحال مسنے و او تینا ملک آتیان پین زرکار آتے ہم اسپیشل اکنامک زون تیٹی زرکاری کن اتنگ ءُ ۔ ہنداوڑ بیست آن زیات چینی کمپنی 600 ملین ڈالرز آن زیات زر انا زرکاری کرینو ۔ دا زرکارآک پاکستان نا متنوع بشخ خاص وڑاٹ سرامکس، کیمیکلز، اسٹیل ، فوڈ پراسیسنگ و آٹو موبائل سیکٹر آتے ٹی زرکاری ٹی ہم است خواہی نا درشانی ءِ کرینو ۔
