اسلام آباد ۔ 03جنوری (اے پی پی) مزن وزیر عمران خان ءَ امیت سہرا کت کہ راجی سلامتی ءِ جیڈھ آنی سر ءَ توا میں پارلیمانی پارٹی ءُُ سروک یکوئی ءِ درشان ءَ کن انت، ملکی معیشت ءِ گہتری ءُُ دیمروئی ءِ واستہ برجائی المی انت، معاشی پڑ ءَ گوستگیں سال ءَ بوھوکیں کامیاتی آناں گیش برجم کنگ ءِ سر ءَ دلگوشی دیگ بوھگ ءَ انت ۔ آ آدینگ ءِ روچ ءَ پاکستان تحریک انصاف ءُُ یکوئی گل آنی پارلیمانی پارٹی ءِ دیودان ءَ گشتانک دیان ءَ کت ۔ مزن وزیر ءِ ھاسیں کمکار ڈاکٹر فردوس عاشق اعوان ءَ وتی ٹویٹ ءَ گوشت کہ آدینگ ءِ روچ ءَ مزن وزیر عمران خان ءِ سروکی ءَ پاکستان تحریک انصاف ءُُ یکوئی گل آنی پارلیمانی پارٹی ءِ دیوان ءَ برجم دارگ بوت ایشی ءِ تہءَ اٹارنی جنرل ءَ پارلیمانی پارٹی ءِ پارلیمنٹ ءَ پجار کنائینوکیں کانودی مٹ ءُُ بدلی ءِ سر ءَ سرج میں بریفنگ دات ۔ دیوان ءَ پاکستان ءَ تحریک انصاف ءُُ کمکی گل آنی باسک آں مزن وزیر ءِ سروکی، الس ءِ گہبود ءُُ ملک ءِ گہتری ءِ واستہ چست کتگیں گامگیج آنی سر ءَ دل یکیمی ءِ درشان کت ۔ مزن وزیر عمران خان ءَ ممبر آناں پنت ءُُ شون کت کہ آ الس ءَ را گیشاں چہ گیش ٹائم دات ءُُ وتی گیشاں چہ گیش الس ءِ جیڈھ آنی گیواری ءَ ھرچ بکن انت ۔ مزن وزیر ءَ شریکیں مردم آناں نوکیں سال ءِ مبارک بات ءُُ دعا ءِ نیمگ کت کہ 2020ملک ءُُ الس ءِ واستہ جوانیں سال ءِ سہرا بہ بات ۔
