اسلام آباد ۔ 02جنوری (اے پی پی) محکمہ موسمیات نا رداٹ بروک آ 24گھنٹہ ٹی قطب دیکی بلوچستان ، خیبر پختونخوا ، بڑزکو پنجاب ، اسلام آباد، کشمیر و گلگت بلتستان اٹی جمبر مننگ تون اوار اوار جاگہ جاگہ غا پِر و برف انا گمان ءِ، پنجاب و بڑزکو سندھ انا گیشتر میدانی علاقہ غاتے ٹی نن نا وخت آ گوتلو مننگ نا گمان ءِ ۔ رپورٹ نا رداٹ تدوک آ 24گھنٹہ ٹی پنجاب و بڑزکو سندھ انا گیشتر میدانی علاقہ وخت اس کہ خیبر پختونخوا نا گڑاس ضلع غاک گوتلو نا پلویڑ اٹی ئسر و ملک انا زیات تر علاقہ غاتے ٹی موسم خشک و یخ وخت اس کہ بڑزکو علاقہ غاتے ٹی بھاز یخ مسنے ولے جیوانی، پسنی، اورماڑہ، تربت، دیر، میر کھانی، کالام ، چترال و دروش نا ضلع غاتے ٹی گڑاس ہند آتیا پِر ریکارڈ کننگا ۔ غٹ آن زیات پِر جیوانی ٹی 15ملی میٹر، پسنی 3، اورماڑہ 2، تربت اسٹ، دیر، میر کھانی 6، کالام، دروش و چترال اٹی 2ملی میٹر ریکارڈ کننگا وخت اس کہ کالام اٹی اسہ انچ اس برف ہم ریکارڈ کننگانے ۔ پنچ شنبے نادے آ ریکارڈ کروک آ کم آن کم درجہ حرارت نا رپورٹ نا رداٹ سکردو ٹی درجہ حرارت منفی 10 ڈگری سینٹی گریڈ ، گوپس منفی 8، بگروٹ، استور پاراچنار منفی 5، مالم جبہ و کالام اٹی منفی 4 ڈگری سینٹی گریڈ ریکارڈ کننگانے ۔
