اسلام آباد ۔ 02جنوری(اے پی پی) وزیر مملکت موسمیاتی بدلی زرتاج گل پارینے کہ پاکستان تحریک انصاف نا حکومت سویلی پنجاب صوبہ نا جوڑ کننگ کن سنجیدگی اٹ کوشست کننگ ءِ،دامسخت اٹی مسلم لیگ (ن) اڑاند ودی کننگ ءِ، نوکاپی دیر انا رکھ اکن وزارت موسمیاتی بدلی ’’ریچارج پاکستان ‘‘ ڈٹ آ کاریم نا بناءِ کرینے ۔ داخیال آتا درشانی ءِ او ’’اے پی پی‘‘ تون گپ وتران کرسا کرے ۔ زرتاج گل پارے کہ مسلم لیگ (ن) نا شرپسند عنصر آک سویلی پنجاب ءِ پین بشخنگ کن بہاولپور صوبہ نا بحالی کن پنجاب اسمبلی ٹی قرارداد اس پیش کرسا دا پک کریر کہ او سویلی پنجاب نا الس تون مخلص افس ۔ اوپارے کہ حکومت غٹ آن زیات نشست سویلی پنجاب آن دوئی کرے و داجاگہ نا محرومی تے چٹفنگ کن جتا ءُ صوبہ اس جوڑ کننگ کن سنجیدگی اٹ گام گیج کننگ ءِ دا مسخت کن ننکن غٹ آن بھلا چیلنج اِراتہائی اکثریت نا ءِ ۔ اوپارے کہ دا پاکستان پیپلزپارٹی و مسلم لیگ (ن) کن آزمائشت نا وخت اگہ او سویلی پنجاب نا جوڑ کننگ کن مخلص ءُ تو منافقی نا جاگہ غا نن تون تفر، انتئے کہ مستین اٹی ہڑتوم آ جماعت آک اسہ جتا ءُ صوبہ سے نا نعرہ ءِ خلکوسر ۔ اوپارے کہ سویلی پنجاب اٹی ڈیرہ غازی خان نا مشی آ جل تیٹی 12لکھ کیوسک آن زیات دیر انا کوڑی تا گنجائشت ارے ہرا تربیلا ڈیم آن زیات بجلی ودی کننگ کیک ۔ اوپارے کہ پنجاب حکومت ڈی جی خان نا مشی آ جل تیا ترند پِر و نوکاپ نا دیر ءِ بچفنگ کن چنکو ڈیم تفنگ نا منظوری ءِ تسنے ہراڑان بجلی ودی کننگ اٹ کمک رسینگک ۔ اوپارے کہ نوکاپی دیر انا رکھ اکن وزارت موسمیاتی بدلی ’’ریچارج پاکستان‘‘ ڈٹ آ کاریم نا بناءِ کرینے ۔ داڈٹ انا رداٹ خاص وڑاٹ سندھ و بلوچستان اٹی جوان انگا ہند آتیا بھلو تلاپ جوڑ کننگک ہراڑان نئے بیرہ ڈغار اٹی دیر انا کچ ءِ بڑز مننگ اٹ کمک رسینگک بلکن فصل آتا دسنگ کن ہم دیر ملک، دا ڈٹ اکن ای پاکستان اٹی یورپین یونین نا سفیر تون ہم ہیت کریٹ او دا ڈٹ انا ستاءِ کرے و ہروڑ کمک کننگ نا باور کرفینے، داکان بیدس گلوبل کلائمیٹ فنڈ ہم دا بابت مالی کمک کیک ۔
