اسلام آباد ۔ 02جنوری (اے پی پی) دفترخارجہ نا ترجمان عائشہ فاروقی پارینے کہ 2019ء ٹی پاکستان نا خارجہ پالیسی سرسہب مس، چین، ترکی، سعودی عرب و امریکہ تون اوار پیشن نا دنیا تون تعلقداری تیٹی گچینی اتنگا، وزیراعظم عمران خان 5 اگست نا غیر کانودی بھارتی گام گیج آتیان پد مچ آ دنیا ٹی بھارت نا ہندو توا پالیسی ءِ بے نقاب کرے وخت ا س کہ کشمیر نا ویل ءِ اقوام متحدہ تون اوار جہانی کہول آ پبی وڑاٹ تالان کرے، ننا مچ آ دنیا ٹی بھاز انگا شریدار آک ءُ ، امریکہ طالبان مذاکرات اٹی پاکستان کمکاری نا کڑد ءِ ادا کرسا کیک ۔ داخیال آتا درشانی ءِ او پنچ شنبے نادے آ پوسکن آ سال انا اولیکو ہفتہ وار میڈیا بریفنگ اٹی کرے ۔ اوپارے کہ پوسکن آ سال انا اولیکو بریفنگ آ غٹ ءِ مبارکبادی تس و دا اومیت نا درشانیءِ کرے کہ پوسکن آ سال ننا غٹ اکن گچینی اتیک ۔ ترجمان پارے کہ 2019ء ٹی پاکستان نا خارجہ پالیسی سرسہب مس، چین، ترکی و سعودی عرب تون تعلقداری تیٹی گچینی بس وخت اس کہ امریکہ تون سٹریٹجک تعلقداری گچین مس، ہنداوڑ ملائشین و اوغان صدور، برطانوی شاہی جوڑہ، سعودی و یو اے ای نا ولی عہد پاکستان آ بسر، داٹی پاکستان نومبر اٹی کرتارپور راہداری ءِ ہم ملا ۔ اوپارے کہ 5 اگست نا بھارتی غیر کانودی گام آن پد وزیر خارجہ مخدوم شاہ محمود قریشی و وزیراعظم عمران خان مچ آ دنیا ٹی بھارت نا ہندو توا پالیسی ءِ پاش کریر ۔ وزیراعظم اقوام متحدہ نا جنرل اسمبلی ٹی کشمیر نا ویل ءِ ہرفے وخت اس کہ وزیر خارجہ اقوام متحدہ نا سیکرٹری جنرل ءِ ہفت چھٹی نوشتہ کرے ۔ اوپارے کہ او آئی سی کشمیر نا ویل آ پورو مخ تفی ءِ کرسا 5 اگست آن پد او آئی سی نا اِر ادیوان اڈ تس، کشمیر نا بابت او آئی سی وزیر خارجہ غاتا دیوان آ کاریم مننگ ءِ ہرا اپریل اٹی پاکستان اٹی مریک ۔ اوپارے کہ5 اگست آ بھارت نا غیر کانودی و اسہ کنڈی گام گیج آتیا ننا سرکڑدہ کشمیری تا تکلیف آتے تالان کرے، بھارت اٹی برجا ہندو توا نظریہ ءِ دنیا نا مون آ پاش کرے، جہانی برادری ہندتوا نا سوب ڈیہہ ءِ مون تروک امن و سلامتی ءِ مون تروک گڑتی تیان آگاہ مسنے ۔ ترجمان پارے کہ وزیر خارجہ شاہ محمود قریشی داوخت اسکان اقوام متحدہ نا جنرل اسمبلی، سلامتی کونسل و انسانی حق کونسل ءِ 7چھٹی نوشتہ کرینے ۔ ستمبر اٹی او آئی سی کانٹکٹ پڑک کشمیر آ اسیجا اعلامیہ اس جاری کرے ۔ امریکی ایوان ہائے نمائندگان اٹی اِرا قراردا د نا مسودہ ءِ پیش کننگا ۔ عائشہ فاروقی پارے کہ اینو جموں و کشمیر اٹی انسانی المیہ 151 می دے اٹی پترینگانے ۔ پاکستان کشمیر اٹی انٹر نیٹ ءِ ملنگ، گھیڑ ءِ چٹفنگ، جبری گمشدہ ورناتا یلہ کننگ و سول سوساءٹی باسک آتے ہلنگ نا خواست کیک ۔ اوپارے کہ پاکستانی حکومت نا پارت آ اسہ خصوصی ءُ جہاز اس ملائیشیا ٹی اختہ پاکستانی تے پدی اتنگ کن رادہ کننگا، پاک چین واپار نا ارٹ میکو مرحلہ ءِ تدوک آ دے فعال کننگا، داکان بیدس ادائیگی تیٹی تواز ن ءِ پک کننگ کن چندی گام گیج کننگانے ۔ یکم جنوری آ ہرسال پاکستان و بھارت نا نیام اٹ بندی تا لڑ تے اسہ ایلو ءِ تننگک، دا لڑتا رداٹ 267پاکستانی بھارتی جیل آتے ٹی ءُ ۔ اوپارے کہ نن امریکہ و ایران نا نیام اٹ باندات آتے سنجیدگی اٹ ہُننگ اُن ۔
