وزیراعظم عمران خان نورخان ایئر بیس آ اودے بخیر کرے

ابو ظہبی نا ولی عہد شیخ محمد بن زاید النہیان اسلام آباد آ سرمس

اسلام آباد ۔ 02جنوری (اے پی پی) ابوظہبی نا ولی عہد و متحدہ عرب امارات (یو اے ای) نا سلہہ بند فوج انا نائب سپریم کمانڈر شیخ محمد بن زاید النہیان پنچ شنبے نادے آ اسہ دے ئی دورہ غا اسلام آباد آ سرمس ۔ وزیراعظم عمران خان نورخان ایئر بیس آ شرفمند آ مہمان ءِ بخیر کرے ۔ روایتی لویس اٹ ملبوس اِرا چناشرفمند آ مہمان ءِ گلدستہ اس پیش کریر ۔ داوخت آ بنجائی وزیر توانائی و پٹرولیم عمر ایوب خان ہم ساڑی ئس ۔ داکان پد وزیراعظم عمران خان ابوظہبی نا ولی عہد نا گاڈی ءِ تینٹ چلیفسا بالی پٹ آن رادہ مس ۔ متحدہ عرب امارات نا بڑزکو کہول انا ڈل ہم ولی عہد تون اوار ءُ ۔ شیخ محمد بن زاید النہیان تینا دورہ ٹی وزیراعظم تون اوڑدہی کیک ۔ وزیراعظم عمران خان شرفمند آ مہمان نا شرف اٹی دے انا اِرغ اس ہم ایتک ۔ ہڑتوم آ راہشون تا نیام اٹ اوڑدہی ٹی تین پہ تینی است خواہی نا ہڑتوم آ کنڈآتا، علاقائی و جہانی باندات آتیا گپ و تران مریک ۔ متحدہ عرب امارات (یو اے ای) و پاکستان نا نیام اٹ پدریسہ بڑزکو کہولی دورہ و اوڑدہی ہڑتوم آ ملک آتا نیام اٹ خوشگوار و خڑکی تعلقداری تا اہمیت نا درشانی ءِ ۔ دا دورہ پاکستان و یو اے ای نا نیام اٹ استوار خصوصی تعلقداری تا سوگوی نا عکاس ءِ ۔ دا تعلقداریک اسیجا عقیدہ ، دودوربیدہ خڑکی و دا عزم آ استوار ءُ کہ ہڑتوم آ ملک آتا نیام اٹ تین پہ تینی کمکاری ءِ پوسکن آ بڑزی و رفعت آتیان ہمکنار کننگے ۔ یو اے ای دے ٹک نیامی ٹی پاکستان نا غٹ آن بھلا واپاری شریدار و زرکاری نا اسہ بھلو ذریعہ اسے ۔ یو اے ای تعلیم، جان جوڑی و توانائی نا بشخ آتے ٹی پاکستان نا بنداوی و بھلا شونداری شریدار ءِ ۔ یو اے ای ٹی 16لکھ آن زیات پاکستانی رہینگ انگ ءُ ہرا سالانہ جی ڈی پی ٹی کم و ود 4;46;5 ارب ڈالر نا زرمبادلہ مون ترسا تینا بشخ ءِ شاغرہ ۔ ولی عہد نا دورہ غان پاکستان و متحدہ عرب امارات نا نیام اٹ کثیر الجہتی تعلقداری تے پین مون آ دننگک ۔ ابوظہبی نا ولی عہد داکان مست جنوری 2019ء ٹی ہم پاکستان آ بسوسس ۔