اسلام آباد ۔ 02جنوری (اے پی پی) ابوظہبی نا ولی عہد و متحدہ عرب امارات (یو اے ای) نا سلہہ بند فوج انا نائب سپریم کمانڈر شیخ محمد بن زاہد النہیان پنچ شنبے نادے آ اسہ بڑزکو کہول انا ڈل اسے تون اوار اسلام آباد آ سرمریک ۔ دفترخارجہ آن جاری بیان نا رداٹ شیخ محمد بن زاہد النہیان تینا دورہ ٹی وزیراعظم تون اوڑدہی کیک و وزیراعظم اونا شرف اٹ دے انا اِرغ اس ایتک ۔ اوڑدہی ٹی ہڑتوم آ راہشون تا نیام اٹ اوڑدہی ٹی تین پہ تینی است خواہی نا ہڑتوم آ کنڈآتا، علاقائی و جہانی باندات آتیا ہیت وگپ مریک ۔ متحدہ عرب امارات (یو اے ای ) و پاکستان نا نیام اٹ پدریسہ بڑزکوکہولی دورہ و اوڑدہی ہڑتوم آ ملک آتا نیام اٹ خوشگوار و خڑکی تعلقداری تا اہمیت نا درشانی ءِ ۔ دا دورہ پاکستان و یو اے ای نا نیام اٹ استوار خصوصی تعلقداری تا سوگوی نا عکاس ءِ ۔ دا تعلقداریک اواری عقیدہ، دودوربیدخڑکی و دا عزم انا استوار ءُ کہ ہڑتوم آ ملک آتا نیام اٹ تین پہ تینی کمکاری نا پوسکن آ بڑزی و رفعت آتیان ہمکنار کننگے ۔ یو اے ای دے ٹک نیامی ٹی پاکستان نا غٹ آن بھلا واپاری شریدار و زرکاری نا اسہ بھلو ذریعہ اسے ۔ یو اے ای ، تعلیم، جان جوڑی و توانائی نا بشخ آتے ٹی پاکستان نا بنداوی و بھلا شونداری شریدار ءِ ۔ یو اے ای ٹی شانزدہ لکھ آن زیات پاکستانی رہینگ انگ ءُ ہرا سال اٹی جی ڈی پی ٹی کم و ود 4;46;5 ارب ڈالر نا زرمبادلہ مون ترسا تینا بشخ ءِ شاغرہ ۔ ولی عہد نا دورہ غان پاکستان و متحدہ عرب امارات نا نیام اٹ کثیر الجہتی تعلقداری تے پین مون آ دننگک ۔
