اسلام آباد۔ 01جنوری (اے پی پی) امیر البحر ایڈمرل ظفر محمود عباسی پارینے کہ پاک بحریہ سمندری دنگ انا دفاع تون اوار اوار سی پیک و خاص وڑاٹ گوادر پورٹ انا سیکورٹی کن ہروخت تیار ءِ، 2019ء ٹی چندی میزائل آتا سرسہب سم کاری پک کرے کہ پاک بحریہ ہروڑنا جارحیت نا ورندی ءِ تننگ نا لائخی تخک، او پاکستان نیوی فلیٹ نا سالانہ ایفیشنسی کمپٹیشن پریڈ 2019ء و انعام آتا بشخنگ نا دود آن تران کریکہ۔ ترجمان پاک بحریہ نا رداٹ چیف آف دی نیول اسٹاف ایڈمرل ظفرمحمود عباسی دود انا مہمان خاص ئس۔ نیول چیف نا پاکستان فلیٹ نا 2019ٹی آپریشنل سرجزآتیا است جمی نا درشانی ءِ کرساپارے کہ پاک بحریہ نا ریجنل میری ٹائم سیکورٹی پیٹرولز آن ڈیہہ ءِ امن و سوگوی ملنگ ءِ۔ داکان مست کمانڈر پاکستان فلیٹ وائس ایڈمرل آصف خالق سال 2019ء ٹی فلیٹ نا آپریشنل اختہ ئی تا جاچ ءِ پیش کرسا پارے کہ تدوک آ سال اٹی پاکستان فلیٹ چندی جہانی بحری مشق آتے ٹی بشخ و خاص وڑاٹ امن 2019ء نا میزبانی ءِ کرے۔ دا مشق آتے ٹی اوار مننگ آن پاک بحریہ نا آپریشنل تیاری و کسبی لائخی تیٹی بھلو ودکی اس مس۔ کمانڈر پاکستان فلیٹ پارے کہ فلیٹ یونٹ آتا مسابقتی کارکڑد انا جاچ گچین آن گچین نا جستجو ٹی اہم کڑد اس ادا کیک۔ دود انا ایسر آ مہمان خاص 2019ء ٹی نمان کارکڑد نشان تروک آ یونٹ آتے ٹی پروفیشنسی شیلڈز بشخ وپانٹ کرے۔
