دشمن تا کوشست ءِ کہ پاکستان اٹی بے چیٹی تالان کننگے، وزیر خارجہ نا عظیم روحانی پیشوا حضرت شاہ رکن عالم نا 706می سالانہ عرس انا بنائی دود آن تران
ملتان۔ 01جنوری (اے پی پی) وزیر خارجہ مخدوم شاہ محمود قریشی پارینے کہ بھارت اٹی مسلمان تیا ظلم کاٹم آن گدرینگانے۔ ہندوستان اٹی پارسی، بدھ، عیسائی و خاص وڑاٹ مسلمان تتون انت کہ مننگ ءِ اوڑان پاکستان نا قدر و قیمت نا معلوم مریک کہ پاکستان ننکن اخس ضروری ءِ۔ داخیال آتا درشانیءِ او برصغیر نا عظیم روحانی پیشوا حضرت شاہ رکن عالم نا706 می سالانہ عرس انا مسہ دے ئی دود آتا بناءِ کرسا کرے او مستی پارے کہ مقبوضہ کشمیر نا مسلمان تے جمعہ نا نماز اسکان خواننگ نا موکل تفننگک۔ ہندوستان دعویٰ تو سیکولرازم نا کیک ولے بھارت اٹی رہینگوک آ اقلیت خاص وڑاٹ مسلمان تیا ظلم انا زی آ ظلم کننگ ءِ۔ وزیر خارجہ پارے کہ مودی حکومت نا ہندوتوا نا سوچ اقلیت آتے آئین اٹ تروک آ غٹ حق آتے لتاڑانے۔ اوپارے کہ پاکستان نا برخلاف ہائبر ڈ جنگ مسلط کننگانے جنگ انا دا پوسکن آ وڑاٹ ٹینک و توپ آتے کاریم اٹ اتنگپک دُن تو سیم تیا نن داہم مننگ ءِ۔ شاہ محمود قریشی پارے کہ دشمن تا کوشست ءِ کہ پاکستان اٹی بے چیٹی تالان کننگے و خار ءِ تہو تننگے۔ ہراڑان دنیا ءِ کلہو ملے کہ دا قوم منتشر مننگ ءِ۔ نمے نفسیاتی وڑاٹ نزور کننگ دا وار فیئر نا بشخ اسے۔ اوپارے کہ ہراقومک دشمن تے چارہ اوہبکہ مفسہ جوان ءُ کسر اس پٹرہ۔ وزیر خارجہ مستی پارے کہ پوسکن آ سال انا بناآ نن بحیثیت قوم تہیہ کین کہ پاکستان ءِ شیف نشان تننگ نا کوشست کروک آتا ارادہ غاتے مش تا کروئی ءِ۔ وزیر خارجہ پارے کہ نن اسہ واکدار ءُ قوم اسے اُن نزور افن۔ مالی مشکلات ارے اوفتا ہم مون ءِ تورنہ۔ وزیر خارجہ ملک انا چندی بشخ آتیان بروک آ زائر آتیان تران کرسا پارے کہ ننے دا آستانہ غاتیان دشمن ءِ یکجہتی نا کلہوءِ تروئی ءِ۔ اوپارے کہ دین نا بزرگ آتا رغاموک آتیا عمل کرسا زند ءِ زیبدار کننگ کینہ۔ راج ءِ امن نا وت اس جوڑ کننگ کینہ۔ اللہ نا ولیک امن، رواداری و اخوت نا کلہو ءِ لس کریر اوفتا رغاموک آتیان متاثر مرسا غیر مسلم تا بھلو کچ اس اسلام نا حلقہ اٹی داخل مسر۔ اوفتا فیض اینو ہم برجاءِ۔ داوخت آ بنجائی پارلیمانی سیکرٹری مخدوم زادہ زین قریشی، صوبائی پارلیمانی سیکرٹری جاوید اختر انصاری، سیکرٹری اوقاف گلزار حسین، عالم دین، مشائخ عزام، پوریاگر آتون اوار زائر آتا بھلو کچ اس ساڑی ئسر۔
