اسلام آباد۔ 01جنوری (اے پی پی) بنجائی وزیر بجلی و پٹرولیم عمر ایوب خان پارینے کہ دسمبر 2018ء نامقابلہ ٹی دسمبر 2019ء ٹی گیس صارف آتے 12 درسد ودکی گیس تننگا، ایس این جی پی ایل نا اُرائی صارف آتے 47 درسد ودکی گیس فراوان کننگانے وخت اس کہ ایس ایس جی سی نا اُرائی صارف آتا گیس انا طلب اٹی 20 درسد نا ودکی مسنے۔ جنوری ٹی سی این جی نا بشخ ءِ وقتا فوقتا و فروری ٹی پورو گیس فراوان کننگک۔ چارشنبے نادے آ تینا ٹویٹ اٹی اوپارے کہ دسمبر 2018ء ٹی ایس این جی پی ایل نا اُرائی صارف آتا اوسطاََ 831 ایم ایم سی ایف ڈی گیس فراوان کننگاسس۔ دسمبر 2019ء نا اولیکو 15دے اٹی اُرائی صارف آتے 30 درسد ودکی گیس فراوان کننگا و اوکان پد آن 47درسد اسکان ودکی گیس فراوان کننگا۔ اوپارے کہ سی این جی نا بشخ ءِ جنوری ٹی وقتا فوقتا و فروری ٹی پورو گیس تننگک۔ یخ انا سوب آن گیس انا پریشر اٹی ریکارڈ کمتی خننگانے ولے اسہ ہفتہ ٹی حالیت آتا گچین مننگ نا گمان ءِ۔ اوپارے کہ ایس ایس جی سی نا اُرائی صارف آتا گیس انا طلب اٹی 20 درسد ودکی مسنے۔ پوسکن آ ذرائع و ودکی ایل این جی نا کمک اٹ گیس انا فراوانی ٹی اسہ ہفتہ ٹی پین ودکی کننگ انگ ءِ۔
