لاہور۔ 01جنوری (اے پی پی) لاہورہائی کورٹ نا سینئر انگا جج جسٹس مامون رشید شیخ بطور چیف جسٹس لاہور ہائی کورٹ سوغند ہرفے۔ سے شنبے نادے آ چیف جسٹس لاہور ہائی کورٹ سردار محمد شمیم خان نا ریٹائرڈ منٹ آن پد چارشنبے نادے آ لاہور ہائی کورٹ نا سینئر انگا جج جسٹس مامون رشید شیخ عدالت عالیہ لاہور نا 49می چیف جسٹس نا حیثیت اٹ عہدہ نا سوغند ہرفے۔ گورنر ہاؤس لاہور نا دربارہال اٹی اڈ ہلوک آ سادہ و پروقار دود اٹی گورنر پنجاب چودھری محمد سرور چیف جسٹس مامون رشید شیخ آن اونا عہدہ نا سوغند ہلک۔ داوخت آ وزیراعلیٰ پنجاب سردار عثمان بزدار ہم ساڑی ئس۔ دود اٹی لاہور ہائی کورٹ نا سینئر جج جسٹس محمد قاسم خان، جسٹس سید مظاہر علی اکبر نقوی، جسٹس محمد امیر بھٹی تون اوار عدالت عالیہ لاہور نا ایلو فاضل جج، مسکوہی چیف جسٹس بنجائی شرعی عدالت جسٹس ریٹائرڈ انجم الحسن، مسکوہی چیف جسٹس اسلام آباد ہائی کورٹ جسٹس ریٹائرڈ اقبال حمید الرحمان، مسکوہی چیف جسٹس لاہور ہائی کورٹ جسٹس ریٹائرڈ محمد یاور علی، اسپیکر پنجاب اسمبلی چودھری پرویز الٰہی، صوبائی وزیر کانود راجہ بشارت، اٹارنی جنرل پاکستان، رجسٹرار لاہور ہائی کورٹ عبدالستار، ڈی جی ڈسٹرکٹ جوڈیشری اشتر عباس، بنجائی و صوبائی آفیسر آک، سیکرٹری کانود، چیف سیکرٹری پنجاب، انسپکٹر جنرل پولیس پنجاب، پاکستان و پنجاب بار کونسل نا باسک آک، لاہور ہائی کورٹ و لاہور بارایسوسی ایشن نا عہدیدار آک و وکیل راہشون آتون اوار صوبائی حکومت و لاہور ہائی کورٹ نا آفیسر آتیان بیدس جسٹس مامون رشید شیخ نا عزیز و قریب و سنگت آک ہم ساڑی ئسر۔ سوغندی دود آن پد لاہور لائی کورٹ آ سرمننگ آ چیف جسٹس مامون رشید شیخءِ جم و جوش اٹ بخیر کننگا، رجسٹرار لاہور ہائی کورٹ عبدالستار، ڈی جی ڈسٹرکٹ جوڈیشری اشتر عباس و سیشن جج ہیومن ریسورس ساجد علی اعوان و سینئر ایڈیشنل رجسٹرار ڈاکٹر عبدالناصر ہائی کورٹ نا ایلو آفیسر آک و سٹاف تون اوار فاضل چیف جسٹس ءِ گلدستہ وخت اس کہ پولیس نا چاک و چوبند دستہ اودے گارڈ آف آنر پیش کرے۔ اوکان پد چیف جسٹس مامون رشید شیخ ججز لاؤنج اٹی لاہور ہائی کورٹ نا جج صاحب آتون اوڑدہی کرے، فاضل جج آک چیف جسٹس مامون رشید شیخ ءِ عہدہ ءِ سنبھالنگ آ مبارکبادی تسر۔
