اسلام آباد۔ 09 دسمبر (اے پی پی) صدر مملکت ڈاکٹر عارف علوی پارینے کہ انصاف، پارلیمان و ایگزیکٹو آن پد احتساب ریاست نا اہم پہیہ اس جوڑ مسنے، احتساب واکدار و بھلا بندغ آن بایدے بناکے، پوسکن ءُ تاریخ اس جوڑ مسنے کہ پاکستان اٹی احتساب غیر سیاسی بنداوتیا مون آ ہِننگ ءِ، نیب کانود نا رداٹ ہراڑادوبہ لگک اوثابت کیک کہ کنا دولت روا ءِ یا نیت انا دوبہ درست ءِ، قومی احتساب بیورو اخبار آتے ٹی شینک مروک آ خبر تیا ردعمل تننگ ءِ ہلے، ہر گڑا ءِ خبر اس جوڑ کننگ اخبار نا کلچر مسنے، د نیا ٹی احتساب جمہوری حکومت آتا اڈتننگ آن پد بس ولے غٹ آن مست مسلمان تیکن احتساب نا نظام خواجہ ﷺ نا دور اٹی بناکرے، ریاست مدینہ ہر مسلمان نا تغ ءِ۔ او دوشنبے نادے آ داڑے انسدادبدعنوانی نا جہانی دے انا وخت آ اڈ ہلوک آ دود آن تران کریکہ۔ صدر مملکت پارے کہ پاکستان تحریک انصاف ہراتم بدعنوانی نا برخلاف جہاد بناکرے تو مخلوق آک پاریرہ کہ پی ٹی آئی ءِ وونٹ ملیپک انتئے کہ مستین اٹی خلقت نا وونٹ آتے بہاٹی ہلنگا، داسہ نن تینا گچین کاری نظام اٹی بدعنوانی نا پورو چٹفنگ کن پین گام گیج کروئی مریک۔ اوپارے کہ اینو ہم احتساب نا پن آ لس بندغ ءِ کنفیوژ کننگک، وڈی خوری نا چٹفنگ کن ننے ہر پہیہ غان فائدہ ہرفوئی ءِ، ملک انا ہر شاری تینا وونٹ انا واک اٹ سیاست اٹ وڈی خوری ءِ چٹفنگ کیک۔ اوپارے کہ کانود اٹی غٹ بایدے بریبر مریر، بدبختی اٹ اشرافیہ و لس بندغ کن جتا جتا کانود نا چیلنج نا اینو ہم مون تروک ءِ، داڑتون مون تننگ وخت انا اہم ءُ گرج اسے، کانود آ عملدرآمد ہم المی ءِ۔ اوپارے کہ 2013ء ٹی گچین مرسا پارلیمنٹ اٹی بسن تو کانود آ عملدرآمد کن مدام توار بڑز کرین انتئے کہ ننا داڑے بھاز انگا کانود آک ءُ ولے عملدرآمد نا کچ کم ءِ۔ اوپارے کہ اگہ بدعنوانی ءِ چٹفنگ نا ادارہ ساڑی ارے و او کانود آ عملدرآمد کرفنگ کپسہ تو اوفتا ساڑی گری نا ہچ ءُ فائدہ اس اف، ہراراج اٹی دا قدر مف کہ دولت ہراکان بسنے تو ہموکان باندات آک خراب مریرہ، ہراتم راج اٹی کرپٹ خلقت آن مر سلنگ نا روایت بناکیک تو گچین نا سفر ہموکان بناکیک۔ اوپارے کہ ننا داڑے احتساب نا تاریخ خواجہ ﷺ نا دور آن بناکریسس ولے دیکی ٹی بادشاہت نا دور اٹی 19 می صدی اسکان احتساب نا ذکر الوکہ ولے ہموڑے جمہوریت و ملک آتا قیام مس تو اوکان پد ہموڑے احتساب ہم بناکرے۔ صدر مملکت ڈاکٹر عارف علوی پارے کہ مستین اٹی پاکستان اٹی احتساب نا پن آ سیاست و مخالف آتیان احتساب نا پن آ بیر ہلنگسا ہنا ولے داسہ پوسکن ءُ تاریخ اس جوڑ مسنے، پاکستان اٹی احتساب غیر سیاسی ءِ و میرٹ آ مون آ ہِننگ ءِ، مستین نا حکومت آتے ٹی وڈی خوری نا زیات کیس مننگ نا سوب آن زیات کیس نظر بننگ ءُ۔
