اسلام آباد۔ 09 دسمبر (اے پی پی) امیر البحر ایڈمرل ظفر محمود عباسی تون ایرانی بحریہ نا کمانڈر، ریئر ایڈمرل ڈاکٹر حسین خانزادی اوڑدہی کرے ہراٹی تین پہ تینی است خواہی نا باندات بشمول ہڑتوم آ ملک آتا بحری فوج انا نیام اٹ کمکاری ءِ پین مون آ دننگ آ گپ و تران کننگا۔ ترجمان پاک بحریہ نا رداٹ مہمان شخصیت نا نیول ہیڈ کوارٹرز آ بننگ آ پاک بحریہ نا سروک ایڈمرل ظفر محمود عباسیءِ بخیر کرے۔ شرفمند آ مہمان ءِ روایتی وڑاٹ گارڈ آف آنر پیش کننگا و شرفمند آ مہمان نا پرنسپل اسٹاف آفیسر آتون درستی راستی ءِ کرفنگا۔ ایرانی بحریہ نا کمانڈر ڈیہہ ٹی سمندری سلامتی و امن ءِ المی کننگ و دہشت گردی نا برخلاف جنگ اٹی پاکستان نا کڑدءِ مون آ تخا۔ اوکان پد شرفمند آ مہمان ءِ حوال تننگا ہراٹی اودے آرٹیکل 370و 35اے انا منسوخی آن پد آن مقبوضہ کشمیر اٹی جاری بھارتی جارحیت آ پاکستانی موقف آن معلومدار کننگا۔ شرفمندآ مہمان ڈیہہ ٹی بحری سیکورٹی و سوگوی نا بابت پاک بحریہ نا کوشست آتا ستاءِ کرے۔ کمانڈر ایرانی بحریہ نا دا دورہ غان ہڑتوم آ ملک خاص کر بحری فوج آتا نیام اٹ ہڑتوم آ کنڈآتا کمکاری ءِ پین مون آ دننگک۔

متعلقہ مضامینمصنف کی طرف سے مزید