اسلام آباد۔ 09 دسمبر (اے پی پی) سیکرٹری خارجہ سہیل محمود پارینے کہ سارک چارٹر ڈے نیزگاری، جہالت و ناجوڑی تا چٹفنگ نا عزم انایات ترفک، پاکستان سارک عمل ءِ سرسہب کننگ کن پرعزم ءِ، سویلی ایشیاءِ بھاز انگا چیلنج آک مون تروک ءُ ہرافتے تون مون تننگ کن ننے اسیجا لائحہ عمل اس اختیار کروئی مریک۔ داخیال آتا درشانی ءِ او دوشنبے نادے آ 35می سارک چارٹر ڈے انا بابت وزارت خارجہ ٹی اڈ ہلوک آ دود آن تران کرسا کرے۔ دود اٹی سارک ملک آتیان تعلق تخوک آ سفیر و وزارت خارجہ نا سینئر کمامدارآک بشخ ہلکر۔ دود آن سیکرٹری خارجہ سہیل محمود و سارک تنظیم نا مسکوہی سیکرٹری جنرل وپاکستان اٹی مالدیپ نا سفیر احمد سلیم ئسک خیال آتا درشانی ءِ کریر۔ داوخت آ سیکرٹری خارجہ سہیل محمود پارے کہ 1985ء آ سارک چارٹر نا کمک اٹ دا عزم انا درشانی ءِ کننگاکہ سویلی ایشیا آن نیزگاری نا چٹفنگ و ویل آتا پرامن ایسری کن اسیجا کوشست آتے کاریم اٹ اتنگک۔ اوپارے کہ سارک فورم آن اسیجا کوشست آتیان پد ہم سویلی ایشیا ءِ بھاز انگا چیلنج آک مون تروک ءُ ہرافتے تون مون تننگ کن ننے اسیجا لائحہ عمل اس اختیار کروئی مریک۔ سیکرٹری خارجہ پارے کہ سارک چارٹر ڈے نیزگاری، جہالت و ناجوڑی تا چٹفنگ نا عزم انا یات ترفک، پاکستان سارک پراسیس ءِ سرسہب کننگ کن پرعزم ءِ۔ سیکرٹری خارجہ پارے کہ وزیراعظم عمران خان 35می سارک چارٹرڈے آ سارک باسک ملک و اوفتا الس ءِ مبارکبادپیش کرسا پارے کہ راہشونک سویلی ایشیا نا شونداری و شونہالی کن اواری اٹ کاریم کننگ کن سارک چارٹراس مرتب کریر۔ پاکستان ڈیہہ ٹی تین پہ تینی کمکاری آن شونداری نا وارخواہی فراوان کننگ آ یخین تخک۔ داوخت آ مالدیپ نا سفیر احمد سلیم پارے کہ سارک فورم سویلی ایشیا ٹی نیزگاری نا چٹفنگ و معاشی سوگوی کن معرض وجود اٹ بسنے۔ ننے دیرپا شونداری تون اوار ایلو ہدف آتا دوئی کننگ کن اسیجا کوشست کروئی مریک۔ اوپارے کہ اینو نادے ننے تینا عزم انا درشانی ءِ کروئی ءِ کہ نن سارک انا پلیٹ فارم آن نیزگاری نا چٹفنگ و معاشی سوگوی ءِ شرمندہ تعبیر کینہ۔ داوخت آ ڈائریکٹر سارک انرجی سینٹر محمد نعیم ملک نا کنڈآن خصوصی انرجی اسٹال اس ہم خلنگا ہراٹی سارک ملک آتا پسماندہ علاقہ غاتا باسی تیکن انرجی سلوشن آتا ماڈل اس پیش کننگا۔ دود انا ایسر آ سی ءُ پنچ می سارک چارٹرڈے انا بابت کیک اس ہم کاٹ کننگا۔
