اسلام آباد۔ 09 دسمبر (اے پی پی) پاکستان اٹی 35می سارک چارٹرڈے انا مناسبت اٹ سارک چیمبرز آف کامرس اینڈ انڈسٹری نا کنڈآن وزیراعظم نا سلاہکار عبدالرزاق داؤد نا کماشی ٹی اسہ دود اس سے شنبے نادے آ مریک۔ سارک چیمبر نا سینئر نائب صدر افتخار علی ملک خطبہ بیابخیری اس ایتک وخت اس کہ ایف پی سی سی آئی نا صدر انجینئر دارو خان اچکزئی، پنی آ پوریاگر راہشون و باسک ملک آتا پنی آ پوریاگر نمائندہ غاک ہم تران کیرہ۔ داڑے جاری بیان نا رداٹ سارک ملک آتا راہشون، سفیر و ہائی کمشنرز، سارک ادارہ غاتا نمائندہ غاک ہم سارک تنظیم نا ہدف و ہدف آتون گنڈوکی نا درشانی ءِ کرسا دود اٹی بشخ ہلیرہ۔ 8 دسمبر 1985ء آ ڈھاککہ ٹی اڈ ہلوک آ اولیکو سارک سروک دیوان اٹی ہفت سویلی ایشیائی ملک مالدیپ، بھارت، بھوٹان، پاکستان، نیپال، بنگلہ دیش و سری لنکا نا راہشونک سویلی ایشیائی کمکار تنظیم (سارک) انا اڈتننگ نا معاہدہ غا دستخط کریسر۔ دادے انا مناسبت اٹ ہر سال سارک چارٹرڈے اڈتننگک۔ داوخت آ غٹ باسک ملک آتے ٹی خصوصی یات گاری دود اڈتننگک۔ دنیا نا ترند رفتار معاشی شونداری والا ڈیہہ نا ملک آتا نمائندہ تنظیم نا حیثیت اٹ، سارک سویلی ایشیائی الس و حکومت آتا ڈیہہ ٹی بریبری، علاقائی سالمیت، امن، سوگوی، سیوت و شونداری کن اجتماعی وڑاٹ کاریم کننگ نا است خواہی نا درشانی ءِ۔ سویلی ایشیا ءِ دہشت گردی، کچٹی، نیزگاری، بے روزگاری، غیر منظم شاری آبادکاری، باہوٹ، سیاسی نزوری، وڈی خوری و متعدی و غیر متعدی مرض کون آ ویل آتا مون تروک ءِ۔ 35 درسد ورناآبادی تون دا ڈیہہ بیست و یک می صدی نا بھلا ورک فورس ءِ وخت اس کہ ایلو دنیا ٹی عمررسیدہ آبادی نا کچ زیات ءِ۔ ہنداخاطران باسک ملک آتا نیام اٹ گچین کمکاری آن دا ڈیہہ آخبت اٹ اسہ سوگو زرگزران و گچین راج انا عملی عکس اس ثابت مننگ کیک۔
