اسلام آباد۔ 09 دسمبر (اے پی پی) اسپیکر قومی اسمبلی اسد قیصر پارینے کہ چندی ادارہ غاتا نیام اٹ جامع شریداری اٹ بدعنوانی نا مون ءِ توننگ مریک، بدعنوانی نا چٹفنگ مچ آ قوم انا توار ءِ، ہراوخت اسکان کرپشن چٹپک ملک شون ہلنگ کپک۔ داخیال آتا درشانی ءِ او ایوان صدر اٹی انسداد بدعنوانی نا جہانی دے انا وخت آ سیمینار آن تران کرسا کرے۔ اوپارے کہ بدعنوانی آن بے روزگاری و نیزگاری کون آ ویل آک ودی مریرہ انتئے کہ دا وسیلہ غاتے کُنیک۔ نن بدعنوانی کروک آتا پیدواری ءِ کرسا بایدے دا لعنت ءِ ماس کش کین۔اوپارے کہ بدعنوانی آن کاروباری سرجزآک زہمی مریرہ۔ شونداری ڈٹ آتا رفتار سست مننگ تون اوار اوار خڑچ اٹی ودکی ہم مریک۔ اوپارے کہ بدعنوانی آن حکومت نا السی راجی آسراتی نا پالیسی تیا عملدرآمد اٹی اڑاند ودی مریک۔ اوپارے کہ بدعنوانی نا توننگ دنیا نا اصلاحاتی ایجنڈا غا اہم ءُ ٹک اس مسنے۔ بدعنوانی نا توننگ کن ریگولیٹری اتھارٹیز و آڈیٹرآک بایدے آجوئی اٹ کاریم کیر۔ اوپارے کہ نیب الس ءِ بدعنوانی نا منفی زہم تیان آگاہ کننگ کن گچین گام گیج کرینے۔ چیئرمین نیب انا کماشی ٹی نیب شاندار کارکڑد نا درشانی ءِ کننگ ءِ۔ اوپارے کہ چندی ادارہ غاتا نیام اٹ شریداری آن بدعنوانی نا مون ءِ توننگ مریک۔ اوپارے کہ کانود سازی نا چیلنج آتون مون تننگ کن ہڑتوم آ ایوان تا حکومت و اپوزیشن نا باسک آتیا تالان خصوصی کمیٹی اس جوڑ کننگانے ہراکانود سازی نا بابت سرجم جاچ ءِ ہلیک۔ اوپارے کہ تدوک آ پنچ سال اٹی خیبر پختونخواٹی غٹ آن زیات 172بل پاس مس۔ قومی اسمبلی ٹی غٹ آن زیات پرائیویٹ باسک بل اتنگک۔ اوپارے کہ چندی باندات آتیا حکومت و اپوزیشن نا موقف جتا ءُ ولے قومی معاملہ غاتیا ننا غٹ انا موقف اسٹ ءِ۔ بدعنوانی نا چٹفنگ مچ آ قوم انا توار ءِ۔ ہراوخت اسکان کرپشن چٹپک ملک شون ہلنگ کپک۔
