ملک آن بدعنوانی و کرپشن نا توننگ کن نیب آرڈیننس فعال کڑد ادا کرینے و مچ آ ملک اٹی بے پرخ نیب چنکا بھلا بندغ آتا اسہ وڑ احتساب ءِ کننگ ءِ،
کوئٹہ۔ 09 دسمبر (اے پی پی) گورنر بلوچستان جسٹس ریٹائرڈ امان اللہ خان یاسین زئی پارینے کہ ملک آن بدعنوانی و کرپشن نا توننگ کن نیب آرڈیننس فعال کڑد ادا کرینے و مچ آ ملک اٹی بے پرخ نیب چنکا بھلا بندغ آتا اسہ وڑ احتساب ءِ کننگ ءِ، بلوچستان اٹی براہ راست السی ریلیف نا فراوانی آ متعین سرکاری ادارہ غاتا اصلاحات المی ءِ کوئٹہ نا مرکزی سول ہسپتال نا اسٹور دوائی تیان پُر ءِ ولے ڈاکٹر آک مریض آتے تفسہ سرکاری اسپتال آتے ٹی جعلی دوائی تا غاو ک ہم کرپشن نا دنگ اٹ بریرہ است ہسونی نا ہیت دادے کہ ہسپتال اٹی کچک نا ہلنگ نا دوائی دوئی اف مستین اٹی کوئٹہ دنیا نا ساف ستھرا شار ئس ولے داسہ حالیت آک خراب مسنو گچین تعلیم یافتہ خلقت آن شار ءِ ساف ستھرا تخنگ و گڈگورننس نا مشورہ اسکان ہلنگپک، راج اکن ننے غٹ ءِ کڑد ادا کروئی مریک۔ داخیال آتا درشانی ءِ او نیب بلوچستان نا کنڈآن انسداد بدعنوانی نا جہانی دے انا مناسبت اٹ گورنر ہاؤس کوئٹہ ٹی اڈ ہلوک دود آن تران کرسا پارے، گورنر بلوچستان پارے کہ خوانوک آزموندہ کار تعلقدار باندات آتا چاہندار آتیان سلابت کپننگ نا روایت نا سوب ویل آک ایسر مننگ نا جاگہ غا پین خراب مرسا ہناربلوچستان اٹی اینو اخس اسکول بیدس آسراتی تیان چلینگ انگ ءُ خدا نا خوف مفننگ آن کرپشن کروک آتے ملال اف مستین نا حکمرانک ہراتم ہلنگار تو ناجوڑی کن پیشن ہنار اگہ او تینا دور اقتدار اٹی جوان ءُ ہسپتال جوڑ کریرہ تو ملک اٹی درمان نا آسراتی مسکہ۔ گورنر بلوچستان پارے کہ پلوک آ پیسہ غاتے پاکستان آ پدی اتنگے تو ملک ءِ وام تا گرج مفک اوپارے کہ ننے کرپٹ عنصر آتے تینا صف آتیان جتا کروئی مریک۔ دود آن تران کرسا ڈائریکٹر جنرل نیب بلوچستان فرمان اللہ خان پارے کہ قومی احتساب بیورو الس و حکومت نا کمک اٹ کرپشن نا پورو چٹفنگ کن پرعزم ءِ، نیب غٹ کیس آتے ٹی میرٹ ءِ مون آ تخک، اسہ کیس اسے ٹی ہم دباؤ نا گواچی مفک۔ احتساب پاکستان نا گرج ءِ، مچ آ قوم انا اومیت آک نیب اتون گنڈوک ءُ، وطن عزیز نا مش ءِ کرپشن نا ناسور آن پاک کننگ حکومت و فیڈریشن نا عزم ءِ، بلوچستان ناالس نا حالیت نا بنداوی سوب ادارہ و سسٹم نا نزور مننگ ناءِ، ریکوڈک کون آ معدنی وسیلہ غاتیان ہچ ءُ فائدہ اس دوئی کپننگ ہم سسٹم نا نزوری ءِ، ساڑی کانود، رولز و ریگولیشن ساڑی آ دور انا گرج آتے پورو کپک، کوئٹہ ٹی غیر کانودی ہاؤسنگ سوسائٹیز شاراکن اسہ چیلنج اسے نا حیثیت اختیار کرینو، قومی احتساب بیورو بلوچستان رولز اٹی اصلاحات کن صوبائی حکومت تون کمک کننگ کن ہروخت تیار ءِ، درسگاہ تیٹی میرٹ نا برخلاف تقرری داہیت انا کنڈا اشار ہ کیک کہ آخبت نا جوڑ کروک آتا آخبت تون گوازی کننگ انگ ءِ، ڈائریکٹر جنرل نیب نا پاننگ ئس کہ پاکستان نا شمار دنیا نا کرپشن نا حددرجہ گواچی مروک آ ملک آتے ٹی مریک، قومی احتساب بیورو چیئرمین نیب انا ”احساس غٹ اکن اسہ وڑ“ نا پالیسی آ عمل کننگ ءِ، نیب بے پرخ و بے لاگ احتساب آ یخین تخک، ٹراننپینسی انٹرنیشنل نا ساڑی ریٹنگ اٹی پاکستان 180 آن 117 نمبرآ ساڑی ءِ، گیلپ نا سروے نا رداٹ کرپشن نا برخلاف گام گیج آتا سوب 59 درسد خلقت نیب آ پت کیرہ۔ نیب تینا اڈ کننگ آن ہلیس داوخت اسکان 342 ارب روپئی قومی خزانہ ٹی جمع کرفے وخت اس کہ ساڑی چیئرمین نیب جسٹس جاوید اقبال نا کماشی ٹی تدوک آ 25 تُو اٹی 71 ارب روپئی قومی خزانہ ٹی جمع کرفینے۔ کرپشن ءِ صوبہ بلوچستان نا شونداری ٹی اڑاند گوندسا اوپارے کہ بلوچستان ءِ ہراڑے چندی ویل آتا مون تروک ءِ ہموڑے کرپشن ہم داجاگہ نا جم اٹنگا شونداری نا کسر اٹ اڑاند ءِ معدنی دولت آن شپ دا صوبہ نا الس نا حالیت نا بنداوی سوب ادارہ غاتا و سسٹم نا نزور مننگ ءِ، ریکوڈک کون آ معدنی وسیلہ غاتیان ہچ ءُ فائدہ اس دوئی مفننگ ہم داہیت انا نشانی ءِ کہ ادارہ غاک تینا کاریم ءِ جوان وڑاٹ انجام تفننگ ءُ، ساڑی کانود، رولز و ریگولیشن ساڑی آ دور انا گرج آتے پورو کپک، کوئٹہ ٹی سد آتا کچ اٹی بیدس رولز و ریگولیشنز نا جوڑ مروک آ غیر کانودی ہاؤسنگ سوسائٹی شار اکن چیلنج ءُ۔ قومی احتساب بیورو بلوچستان صوبائی حکومت تون کمک کننگ کن ہروخت تیار ءِ، ہرانا کمک اٹ ساڑی کانود نا اول سر جاچ ءِ ہلسا سسٹمءِ سوگو کننگے تانکہ کرپشن نا کسر ءِ بند کننگے، دا چرجوئی ٹی محکمہ خور، محکمہ ایکسائز، محکمہ پی اینڈ ڈی نا رولز اٹی گچینی کن حکومت بلوچستان ءِ سلاہ و سوج پیش کننگ انگ ءِ۔ ڈی جی طالب علم آتے قوم انا سرمایہ گوندسا است ہسونی نا درشانی ءِ کرے کہ درسگاہ تیٹی میرٹ نا خلاف تقرری داہیت انا کنڈا اشارہ کیک کہ آخبت نا جوڑ کروک آتا آخبت تون گوازی کننگ انگ ءِ۔ کرپشن نا برخلاف آگہی مہم اٹی تعلیمی ادارہ غاتا خاص ءُ کڑ داسے دا بابت بلوچستان نا اسکولز، کالجز و یونیورسٹی تیٹی چندی مقابلہ اڈتننگا ہراٹی بلوچستان نا مر مر انگا علاقہ غاتیان ہزار آ طالب علم آک بشخ ہلکر۔ دود اٹی ایڈیشنل آئی جی پولیس اکرم نعیم بھروکا، بریگیڈیئر سید آغاگل، ڈاکٹر عطاء الرحمان ئسک ہم داوخت آ تران کریر۔ یونیورسٹی تا وائس چانسلرز، سیکرٹری صاحبان و طالب علم آتا بھلو کچ اس ہم بشخ ہلکر۔
