کوءٹہ ۔ 06 دسمبر (اے پی پی) وزیراعلیٰ بلوچستان جام کمال خان پارینے کہ 18 می آئینی ترمیم نا رداٹ صوبہ ءِ ملوک آ اختیار آتیان پدی فائدہ ہرفنگ کن کانود سازی نا عمل برجاءِ، خاص وڑاٹ معدنی وسیلہ غاتا پٹنگ و شونداری نا ڈٹ آتے ٹی صوبہ نا شریداری و حق آتا رکھ اکن صوبائی حکومت سوگو موقف آ قائم ءِ ۔ داخیال آتا درشانی ءِ او سینیٹ نا مجلس قائمہ پٹرولیم نا چیئرمین سینیٹر محسن عزیز نا کماشی ٹی اوڑدہی کروک آ ڈل اتون گپ و تران کرسا کرے ۔ سینیٹر تاج آفریدی، سینیٹر میر کبیر محمد شہی ڈل اٹی اوار ئسر ۔ اوڑدہی ٹی بلوچستان نا معدنی وسیلہ و تیل و گیس انا ڈٹ آتیا گپ و تران کننگا و مجلس قائمہ نا باسک آک 18 می ترمیم نا رداٹ قدرتی وسیلہ غاتا ملکیت و حق آتیا وزیراعلیٰ نا موقف نا تائیدءِ کرسا باوری کرفے کہ مجلس قائمہ دا موقف نا پبی مخ تفی ءِ کیک ۔ وزیراعلیٰ قدرتی وسیلہ غاتا شونداری نا بابت صوبائی حکومت نا گام گیج آتا بارواٹی معلومدار کرسا پارے کہ صوبائی حکومت جامع منرل پالیسی اس درستی راستی کرفینے، ہراٹی معدنی کوڑی تتون اوار اوار کانڑ کن آتا فائدہ غاتا رکھ ءِ ہم پک کننگانے، وزیراعلیٰ پارے کہ بلوچستان نا گیشتر ضلع قدرتی گیس آن محروم ءُ دا کمتی ءِ پورو کننگ کن ایل پی جی پلانٹ آتا تنصیب نا ڈٹ آپبی عملدرآمد نا گرج ءِ ، بلوچستان اٹی برجا شونداری عمل نا بابت وزیراعلیٰ پارے کہ صوبہ نا تاریخ اٹی اولیکو وار جون اٹی اینخو مالی سال نا بجٹ نا منظوری آن پد جولائی ٹی شونداری ڈٹ آتا ٹینڈر جاری کننگ نا بناءِ کننگا و داوخت اسکان ہفتاد درسد پوسکن آ ڈٹ آتا ٹینڈر جاری کننگانے، صوبائی حکومت تعلیم نا مون آ دننگ کن ہائر ایجوکیشن نا بشخ اٹی کانود سازی کیک ہرانا صوبائی کابینہ منظوری ءِ تسنے، مجلس قائمہ نا کنڈآن وزیراعلیٰ ءِ پاننگاکہ او تدوک آ دے پی ایم ڈی سی و نجی بشخ اٹی کولا کانڑ تا دورہ ءِ کرسا ہموڑے دوئی آسراتی تا جاچ ءِ ہلکونے، چیئرمین مجلس قائمہ پارے کہ کولا کانڑ آتے کن آسراتی تا بے کچ کمتی ءِ ، پی ایم ڈی سی ءِ کانڑ آتے کن بنداوی آسراتی جان جوڑی، تعلیم و تربیت نا فراوانی نا پارت کننگک ۔ وزیراعلیٰ داوخت آ باوری کرفے کہ نجی کولا کانڑ آتا مالک آتے کانڑ آتا راجی آسراتی کن گام گیج کننگ نا پابند کننگک وخت اس کہ کانڑ کنی نا علاقہ غاتے ٹی بنداوی پنجر نا گچینی کن گام گیج کننگک ۔
