وزیراعلیٰ بلوچستان جام کمال خان نا کماشی ٹی کابینہ نا اہم ءُ دیوان اس اڈ ہلک

دیوان نا ایجنڈا ٹی اوار چندی باندات آتیا سرجم جاچ ءِ ہلسا کابینہ باسک آک امنائی اٹ بھاز انگا اہم فیصلہ غاتامنظوری ءِ تس

کوءٹہ ۔ 06 دسمبر (اے پی پی) وزیراعلیٰ بلوچستان جام کمال خان نا کماشی ٹی کابینہ نا اہم ءُ دیوان اس اڈ ہلک ۔ دیوان نا ایجنڈا ٹی اوار چندی باندات آتیا سرجم جاچ ءِ ہلسا کابینہ باسک آک امنائی اٹ بھاز انگا اہم فیصلہ غاتامنظوری ءِ تس، کابینہ نا مون آ صوبہ نا وسیلہ غاتا کاریم اٹ اتنگ نا بابت چندی باندات پیش کننگا ، و داہیت آ پورو امنا کننگا کہ صوبہ نا دا وسیلہ غاتا گچین کاریم اٹ اتنگ ءِ پک کرسا بلوچستان ءِ خود انحصاری نا کسرآ روان کننگ مریک و چنکو کچ اسے آ معاشی سرجزآتا مون آ دننگ آن لس بندغ ءِ روزگار فراوان کرسا شونہال کننگ مریک ہراکہ وزیراعلیٰ نا وژن و ساڑی حکومت نا اہم اولیت ہم ارے، کابینہ ءِ اخوت فاءونڈیشن نا چیئرمین ڈاکٹر امجد ثاقب نا کنڈآن چنکو کچ اسے آ معاشی سرجز آتا مون آ دننگ کن کم کٹیا والا بندغ آتے بے سودو بے ضمانت چنکا وام تا فراوانی نا ڈٹ آ حوال تننگا ۔ اوپارے کہ اخوت فاءونڈیشن نا رداٹ ایلو صوبائی حکومت آتا شریداری اٹ خلقت ءِ وام تننگ انگ ءِ ہرافتا کچ 35لکھ اسکان ءِ و کم و ود سد ارب روپئی نا وام تننگا ہرافتا پدی تننگ نا کچ 99 درسد آن زیات ءِ و بلوچستان نا ہفت ضلع غاتا دہ ہزار آن زیات بندغ ءِ ہم اخوت فاءونڈیشن وام فراوان کرینے، کابینہ وام تا فراوانی نا پروگرام نا ستاءِ کرسا بلوچستان اٹی ہم صوبائی حکومت و اخوت فاءونڈیشن نا شریداری اٹ پروگرام نا بنانا منظوری ءِ تس، بنائی وڑاٹ 1;46;6 ارب روپئی دا پروگرام کن جتا کننگک ہرافتا کمک اٹ کاروبار ، کشت وکشار و لائیو اسٹاک کون آ بشخ آتے ٹی بلوچستان نا خلقت ءِ وام تننگک ہراڑان نیزگاری ٹی کمتی ممکن مننگ کیک، کابینہ صوبہ ٹی اسکل ڈویلپمنٹ نا مون آ دننگ کن محکمہ راجی آسراتی نا کھاڈی کرافت ڈویلپمنٹ کمپنی و وزارت صنعت و پیداوار تون جوائنٹ وینچر نا منظوری ءِ تس ، کابینہ گوادر اٹی شپ یارڈ نا جوڑ کننگ نا ڈٹ اکن وزارت دفاعی پیداوار ءِ شریداری نا بنداو آ ڈغار تا فراوانی نا منظوری ءِ ہم تس و چیف سیکرٹری نا کماشی ٹی کمیٹی نا ٹہیفنگ نا فیصلہ کننگا ہرا ایکویٹی نا بنداو آ وزارت دفاعی پیدوار تون ڈٹ اٹی بلوچستان نا بشخ انا بابت شڑت آتیا مذاکرات کیک، دیوان ءِ معلومدار کننگا کہ شپ یارڈ نا ڈٹ آن دہ آن پانزدہ ہزار آسامی ودی مریک ہرافتیا تربیت نا فراوانی آن پد ہندی ورناتے روزگار نا وارخواہی تننگک ۔ سی ایس آر نا رداٹ وزارت دفاعی پیدوار گوادرا ٹی ہیومن ریسورس ٹریننگ سینٹر، ہسپتال و ایلو راجی ڈٹ آتا بناءِ کیک ۔ کابینہ غٹ بشخ آتے ٹی انفارمیشن اینڈ کمیونیکشن ٹیکنالوجی نا مون آ دننگ آ گرج آن امنا کرسا دا بابت غٹ محکمہ و ادارہ غاتے گام گیج کننگ نا پارت کرے، کابینہ شاری علاقہ غاتے ٹی غیر منقولہ جائیداد آتا ڈیجیٹیلائزیشن نا ڈٹ انا منظوری ءِ تس ہرانا بنداو آ غیر منقولہ جائیداد آتے پراپرٹی خراج نیٹ اٹ اتنگک ۔ ڈٹ انا بناء بنائی وڑاٹ کوءٹہ غان کننگک ، کابینہ ءِ گڈانی کنڈملیر و اورماڑہ نا کرکی علاقہ غاتے ٹی پبلک پرائیویٹ پارٹنر شپ انا رداٹ سیل و سواتی آسراتی تا فراوانی نا بابت چندی سلاہ پیش کننگا، کابینہ دا سلاہ تا منظوری ءِ ترسا سیل و سوات نا مون آ دننگ نا ڈٹ آتیا اولیتی بنداو تیا عملدرآمد نا بنانا پارت کرے ۔ کابینہ غٹ ضلع غاتا شونداری ءِ پک کننگ کن محکمہ ڈٹ بندی و شونداری نا رداٹ ڈسٹرکٹ پروفائل نا تیاری نا ڈٹ انا منظوری ءِ ہم تس ۔