کوءٹہ ۔ 06 دسمبر (اے پی پی) تربت یونیورسٹی نا وائس چانسلر پروفیسر ڈاکٹر عبدالرزاق صابر پارینے کہ تربت یونیورسٹی و اوڑتون الحاق شدہ کالج آتے ٹی تعلیمی باندات آتے پوسکن آ خواست آتا رداٹ ہم گرنچ کرفنگ کن غٹ دوئی وسیلہ غاتے کاریم اٹ اتنگ انگ ءِ، یونیورسٹی ٹی گڈ گورننس ءِ برجاتخنگ و طالب علم آتے آب اٹ تعلیم فراوان کننگ آ یونیورسٹی انتظامیہ و استاد آتا کوشست آتا ستاءِ کرے، یونیورسٹی و کالج آتے ٹی تعلیمی پروگرام اس بناکننگ آن مست ساڑی آ دور و مارکیٹ نا گرج آتے مون آ تخنگ المی ءِ و وخت اتون اوار اوار ڈینز فیکلٹی و سینئر استاد آتا کمک اٹ اوفتے ٹی پین گچینی اتنگ نا عمل بایدے برجاسلے انتئے کہ تعلیمی بشخ اٹی پوسکن آ خواست آتارداٹ اصلاحات اتنگ وخت انا اہم ءُ گرج اسے ۔ داخیال آتا درشانی ءِ او جمعہ نادے آ یونیورسٹی آف تربت نا اکیڈمک کونسل نا دہ می دیوان نا کماشی ٹی یونیورسٹی نا میٹنگ روم اٹی اڈ ہلوک آ دود آن تران اٹی کرے، داوخت آ رجسٹرار غلام فاروق بلوچ، ڈین فیکلٹی آف لیگل ایجوکیشن و ڈائریکٹر کوالٹی انہانسمنٹ سیل پروفیسر ڈاکٹر گل حسن، کنٹرول امتحانات تنویر احمد، چیئرمین شعبہ مینجمنٹ سائنسز ڈاکٹر وسیم برکت، چیئرمین شعبہ کیمسٹری ڈاکٹر نعیم اللہ ، شعبہ مینجمنٹ سائنسز نا اسسٹنٹ پروفیسر ڈاکٹر ریاض احمد چیئرمین شعبہ کمپیوٹر سائنس مختار حسین، چیئرمین شعبہ کامرس عیسیٰ کریم، چیئرمین شعبہ پولیٹیکل سائنس جمیل احمد، چیئرمین شعبہ لاء محمود امیر ، چیئرپرسن شعبہ انگلش دردرانہ رفیق، چیئرمین شعبہ ایجوکیشن منظور احمد ، اسسٹنٹ پروفیسر ;73667667;محمد طاہر حکیم، لیکچرر پری ناز، پرنسپل گورنمنٹ عطاء شاد ڈگری کالج تربت ڈاکٹر واحد بخش ، پرنسپل گرلز ڈگری کالج تربت زہرابلوچ و لائبریرین عبدالمالک آن بیدس یونیورسٹی نا تدریسی بشخ آتا سروک آک و سینئر فیکلٹی باسک آک ساڑی ئسر ۔ دیوان آن تران کرسا وائس چانسلر ڈاکٹر عبدالرزاق صابر پارے کہ چندی فیکلٹی تا ڈین، تدریسی بشخ آتا سروک آک، کالج نا سروک آک و سینئر استاد آک تینا تینا فیکلٹی و ادارہ غاتے ٹی تعلیمی و پٹ وپولی سرجزآتے ٹی پین گچینی اتنگ کن چندی سلاہ پیش کریر ۔ داکان مست رجسٹرار و سیکرٹری اکیڈمک کونسل غلام فاروق بلوچ ایجنڈا اس پیش کرے ۔ وائس چانسلر باوری کرفے کہ یونیورسٹی نا غٹ انتظامی و تدریسی بشخ آتے ٹی اصلاحات اتنگ نا عمل برجاسلک، و دا چرجوئی ٹی یونیورسٹی تون الحاق مروک کالج آتے ہم راہشونی فراوان کرسا اوفتے ہم اصلاحات نا عمل نا بشخ کننگک ۔ دیوان اٹی نہہ می اکیڈمک کونسل و ایڈوانس سٹڈیز اینڈ ریسرچ بورڈ انا مینٹنس ءِ پک کننگ آن بیدس ایلو تعلیمی باندات آتیا سیر حاصل شرہ کننگا و ضروری فیصلہ کننگا ۔
