اسلام آباد ۔ 06 دسمبر (اے پی پی) پاکستان تحریک انصاف نا باسک قومی اسمبلی کنول شوزب پارینے کہ حکومت غٹ قومی و سیاسی باندات آتے پرامن وڑاٹ ایسر کننگ کن کوشست کننگ ءِ ۔ جمعہ نادے آ اسہ نجی ٹی وی چینل اسے تون گپ وتران کرسا اوپارے کہ پوسکن آ چیف الیکشن کمشنر نا تقرری اپوزیشن نا سوب آن تاخیر نا گواچی ءِ انتئے کہ اپوزیشن دا بابت غیر سنجیدہ رویہ نا درشانی ءِ کرینے و تاخیری چم آتے کاریم اٹ ایسونے ۔ پارٹی فنڈنگ کیس انا بارواٹی اسہ سوج اسے نا ورندی ٹی اوپارے کہ پاکستان تحریک انصاف ملک آن وڈی خوری نا توننگ کن کوشست کننگ ءِ ۔ اوپارے کہ وزیراعظم عمران خان نا کماشی ٹی حکومت لس بندغ نا زند انا آب ءِ گچین کننگ کن سخت خواری کننگ ءِ انتئے کہ کم کٹیا کروک تپہ غاتے تدوک آ کیہی سال آن مشکلات مون تروک ءِ و اوفتا مشکل آتا تدارک وخت انا اہم ءُ گرج اسے ۔ اوپارے کہ ہراتم پی ٹی آئی اقتدار اٹی بس تو قومی زرگزران بھاز تنکی نا گواچی ئس و وزیراعظم عمران خان قومی زرگزران ءِ سوگو کننگ کن غٹ تر ممکنہ گام گیج کننگ ءِ ۔
